មិនលើកលែងសូម្បីប្រធានាធិបតី លោក Bolsonaro ត្រូវបដិសេធចូលទស្សនា ការប្រកួតបាល់ទាត់ ព្រោះមិនចាក់វ៉ាក់សាំង

ប្រធានាធិបតីប្រេស៊ីលលោក Jair Bolsonaro ត្រូវបានបដិសេធឱកាសមើលការប្រកួតបាល់ទាត់រវាងក្លឹប Santos និងក្លឹប Gremio កាលពីថ្ងៃអាទិត្យ ដោយសារតែក្លឹបបាល់ទាត់មិនអនុញ្ញាតឲ្យអ្នកគាំទ្រដែលមិនបានចាក់វ៉ាក់សាំងចូលក្នុងពហុកីឡដ្ឋាន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមវីដេអូដែលបានបង្ហោះដោយសារព័ត៌មានមួយ លោក Bolsonaro បានតវ៉ាថា “ហេតុអ្វីបានជាត្រូវការលិខិតឆ្លងដែនវ៉ាក់សាំងកូវីដ? ខ្ញុំគ្រាន់តែចង់មើលការប្រកួតបាល់ទាត់របស់ក្លឹប Santos ហើយខ្ញុំត្រូវចាក់វ៉ាក់សាំងដែរឬ ។ ហេតុអ្វីបានជាដូច្នេះ?” ។

លោកបានបន្ថែមថា “ខ្ញុំមានអង់ទីគ័រច្រើនជាងអ្នកដែលចាក់វ៉ាក់សាំងទៅទៀត ក្រោយជាសះស្បើយពីជំងឺកូវីដ ១៩ កាលពីខែកក្កដាឆ្នាំ” ។

លោក Bolsonaro មានរឿងអស់សំណើចជាច្រើននាពេលកន្លងមក ខណៈថ្មីៗនេះលោកត្រូវបានបង្ខំឲ្យញ៉ាំភីហ្សានៅចិញ្ចើមផ្លូវ បន្ទាប់ពីលោកមិនត្រូវបានអនុញ្ញាតឲ្យញ៉ាំអាហារនៅខាងក្នុងនៅឯភោជនីយដ្ឋានទីក្រុងញូវយ៉ក ស្របតាមវិធានការប្រឆាំងនឹងមេរោគរបស់រដ្ឋ ខណៈមេដឹកនាំប្រេស៊ីលរូបនេះបានធ្វើដំណើរទៅទីក្រុងញូវយ៉ក ដើម្បីចូលរួមក្នុងមហាសន្និបាតប្រចាំឆ្នាំរបស់អង្គការសហប្រជាជាតិ (UNGA) កាលពីខែមុន ។

លោក Bolsonaro ប្រហែលជាអ្នកប្រឆាំងវ៉ាក់សាំងដែលមានប្រជាប្រិយបំផុតនៅទូទាំងពិភពលោក ដោយបង្ហាញពីការសង្ស័យជាសាធារណៈចំពោះប្រសិទ្ធភាពនៃវ៉ាក់សាំងដែលមានស្រាប់ ។ ទោះយ៉ាងណាក៏ដោយ លោកបានប្រាប់កិច្ចប្រជុំកំពូល UNGA នៅខែកញ្ញាថា រដ្ឋបាលរបស់លោកមិនប្រឆាំងនឹងការចាក់វ៉ាក់សាំងនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ដោយសារតែមិនចាក់វ៉ាក់សាំងកូវីដ ប្រធានាធិបតី ប្រេស៊ីល ត្រូវឈរញ៉ាំភីហ្សាលើចិញ្ចើមផ្លូវ មុនកិច្ចប្រជុំនៅទីក្រុងញូវយ៉ក