កោះបាលី បើកទទួលភ្ញៀវទេសចរ មកពីគ្រប់ប្រទេស វិញហើយ

កោះបាលី ដ៏ល្បីល្បាញរបស់ប្រទេសឥណ្ឌូណេស៊ី នឹងចាប់ផ្តើមស្វាគមន៍ភ្ញៀវទេសចរមកពីគ្រប់ប្រទេសជាថ្មី ចាប់ពីចុងសប្តាហ៍នេះទៅ។

ថ្វីបើកាលពីពាក់កណ្តាលខែតុលា កោះបាលីបានបើកជាផ្លូវការសម្រាប់ភ្ញៀវទេសចរមកពីប្រទេសចិន នូវែលសេឡង់ និងជប៉ុនក្នុងចំណោមប្រទេសខ្លះទៀតក៏ដោយ ប៉ុន្តែចាប់តាំងពីពេលនោះមក មិនមានការហោះហើរត្រង់នោះទេ។ នេះបើយោងតាមការលើកឡើងរបស់រដ្ឋមន្ត្រីក្រសួងទេសចរណ៍លោក Sandiaga Uno ក្នុងសន្និសីទសារព័ត៌មានមួយ។

ការសម្រេចចិត្តនេះបានធ្វើឡើង បើទោះបីជាឥណ្ឌូណេស៊ី មានការកើនឡើងជាលំដាប់នៃករណីឆ្លងជំងឺកូវីដកាលពីខែមករាក៏ដោយ។ បន្ទាប់ពីការផ្ទុះមេរោគ បានស្ថិតនៅក្រោមការគ្រប់គ្រងក្នុងឆមាសទីពីរនៃឆ្នាំមុន អាជ្ញាធរសុខាភិបាលឥណ្ឌូណេស៊ីបានសន្មតថា ការកើនឡើងនាពេលនេះគឺដោយសារតែ វីរុសបំប្លែងខ្លួន​អូមីក្រុង ។

ស្របពេលជាមួយគ្នានោះដែរ លោកទេសរដ្ឋមន្ត្រី Luhut Pandjaitan បាននិយាយថា ចាប់ពីថ្ងៃទី៤ខែកុម្ភៈទៅ ភ្ញៀវអន្តរជាតិដែលចាក់វ៉ាក់សាំងកូវីដរួចរាល់ នឹងនៅតែត្រូវតម្រូវឲ្យធ្វើចត្តាឡីស័កពី៥ទៅ៧ថ្ងៃ។

គួរបញ្ជាក់ថា កោះបាលីបានទាក់ទាញភ្ញៀវទេសចរបរទេសចំនួន ៦.៣ លាននាក់ក្នុងឆ្នាំ២០១៩ ដែលជាឆ្នាំមុនជំងឺកូវីដ១៩វាយប្រហារ ប៉ុន្តែការរឹតត្បិតព្រំដែនដ៏តឹងតែង បានបំផ្លិចបំផ្លាញទេសចរណ៍ ដែលជាធម្មតារួមចំណែក ៥៤% នៃសេដ្ឋកិច្ចរបស់ខ្លួន៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ទោះផ្ទុះកូវីដតែកោះ បាលី អនុញ្ញាតឲ្យរៀបចំពិធីឆ្លងឆ្នាំដើម្បីស្តារសេដ្ឋកិច្ច