ផ្លូវដែក ឡាវ-ចិន ដាក់បន្ថែមរថភ្លើងរត់ ១២០ គីឡូម៉ែត្រក្នុងមួយម៉ោង បំពេញតម្រូវការអ្នកដំណើរ

ក្រុមហ៊ុនផ្លូវដែកឡាវ-ចិនបានប្រកាសថា ខ្លួននឹងដំណើរការរថភ្លើងល្បឿនយឺតបន្ថែមលើរថភ្លើងល្បឿនលឿន EMU ដែលមានស្រាប់ចំនួន ២ គ្រឿងដើម្បីបំពេញតម្រូវការអ្នកដំណើរដែលកំពុងកើនឡើង ។

រថភ្លើងថ្មីដែលនឹងរត់ក្នុងល្បឿន ១២០ គីឡូម៉ែត្រក្នុងមួយម៉ោង និងអាចផ្ទុកអ្នកដំណើរបានជាង ១,០០០ នាក់បានមកដល់ទីក្រុងវៀងចន្ទន៍កាលពីថ្ងៃសុក្រ ។

លោក Vongthong Souphanthong វិស្វកររងនៃក្រុមហ៊ុនផ្លូវដែកឡាវ-ចិន បានប្រាប់ប្រព័ន្ធផ្សព្វផ្សាយកាលពីថ្ងៃសុក្រថា រថភ្លើងថ្មីនេះគ្រោងនឹងចាប់ផ្តើមសេវាកម្មនៅខែក្រោយ ។ ផ្លូវដែកឡាវ-ចិនបានចាប់ផ្តើមសេវារបស់ខ្លួននៅថ្ងៃទី ៣ ខែធ្នូឆ្នាំមុន ហើយរថភ្លើងរបស់ខ្លួនបានដឹកអ្នកដំណើរចំនួន ១២៤,២២៥ នាក់ គិតត្រឹមថ្ងៃទី ១៣ ខែកុម្ភៈ ។

លោកបញ្ជាក់ថា ជាមធ្យម អ្នកដំណើរចំនួន ១,៧២៥ នាក់​​ធ្វើដំណើរលើរថភ្លើងជារៀងរាល់ថ្ងៃ ជាមួយនឹងចំនួនអ្នកដំណើរប្រចាំថ្ងៃកើនឡើងដល់ជាង ២,៨០០ នាក់ ។

លោក Vongthong បាននិយាយថា ដើម្បីបំពេញតម្រូវការដែលកំពុងកើនឡើង ក្រុមហ៊ុនគ្រោងនឹងបង្កើនសេវាកម្មនៅចុងសប្តាហ៍ ព្រោះជាធម្មតាមានអ្នកដំណើរច្រើននៅថ្ងៃសៅរ៍ និងថ្ងៃអាទិត្យ ។

លោកសង្កត់ធ្ងន់ថា ប្រសិនបើវានៅតែមិនគ្រប់គ្រាន់ យើងនឹងភ្ជាប់រថភ្លើង EMU ដែលមានស្រាប់ចំនួន ២ គ្រឿងទៀត ហើយវាអាចផ្ទុកអ្នកដំណើរទ្វេដងដល់ ១,៤០០ នាក់ក្នុងការធ្វើដំណើរម្ដង” ។

ជាចុងក្រោយលោក Vongthong បាននិយាយថា ផែនការទាំងនេះនឹងគ្រប់គ្រាន់ដើម្បីបំពេញតម្រូវការសម្រាប់សេវាដឹកអ្នកដំណើរ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ ចិន ផ្អាកនាំចូលទំនិញ វៀតណាម ធ្វើឲ្យកុងតឺន័របន្តជាប់គាំងនៅតាមព្រំដែន