កងកាំភ្លើងធំ និងទ័ពអាកាស រុស្ស៊ី កម្ទេចមូលដ្ឋាន អាមេរិក ដែលជួយដល់ អ៊ុយក្រែន

ក្រសួងការពារជាតិរុស្ស៊ីបានបញ្ជាក់ថា កងកាំភ្លើងធំ និងទ័ពអាកាសរបស់ខ្លួនបានធ្វើការវាយប្រហារជាបន្តបន្ទាប់ កម្ទេចមជ្ឈមណ្ឌលបញ្ជាការ និងមូលដ្ឋានទ័ពរបស់អ៊ុយក្រែន ក៏ដូចជាមូលដ្ឋានក្រុមហ៊ុនយោធាឯកជនរបស់សហរដ្ឋអាមេរិកដែលជួយដល់កងកម្លាំងទីក្រុងកៀវផងដែរ ។

ក្រសួងបានបញ្ជាក់ថា មូលដ្ឋានទាំងនោះគឺជាទីតាំងរបស់ទាហានស៊ីឈ្នួលជាកម្មសិទ្ធិរបស់ក្រុមហ៊ុន Academi PMC ដែលពីមុនត្រូវបានគេស្គាល់ថាជា ក្រុមហ៊ុន Blackwater ហើយមានទីតាំងនៅជិតទីក្រុង Krasatorsk ក្នុងសាធារណរដ្ឋប្រជាមានិត Donetsk ។

ការវាយប្រហារ​នេះក៏បាន​វាយលុក​ដល់​មូលដ្ឋាន​កងវរសេនាតូច​ជាតិនិយម Kraken និង​មជ្ឈមណ្ឌល​សម្របសម្រួល​ការវាយប្រហារ​ដោយ​មី​ស៊ី​ល​របស់​អ៊ុយ​ក្រែ​នផងដែរ ដែល​មាន​ទីតាំង​នៅក្បែរ​ទីប្រជុំជន Shurino តំបន់ Nikolaev ។

ក្នុងអំឡុងពេលប្រតិបត្តិការនេះ ទីតាំងកាំភ្លើងធំអ៊ុយក្រែនចំនួន ៤៧ កន្លែង និងទីតាំងរបស់កងទ័ពអ៊ុយក្រែនចំនួន ១២៧ កន្លែង ក៏ដូចជាសម្ភារៈយោធាត្រូវបានវាយប្រហារក្នុងរយៈពេល ២៤ ម៉ោងចុងក្រោយនេះ ។

គួរបញ្ជាក់ថា ការវាយប្រហារនេះបានកើតឡើងជាផ្នែកនៃប្រតិបត្តិការយោធាពិសេសរបស់រុស្ស៊ីដែលកំពុងបន្តនៅអ៊ុយក្រែនដែលត្រូវបានចាប់ផ្តើមនៅថ្ងៃទី ២៤ ខែកុម្ភៈ បន្ទាប់ពីមានការបញ្ជាពីលោកប្រធានាធិបតី វ្ល៉ាឌីមៀរ ពូទីន តាមសំណើរបស់សាធារណរដ្ឋប្រជាមានិត Donetsk និង Lugansk ក៏ដូចជាតំបន់ Donbass ក្រោយទទួលរងពីការបាញ់ផ្លោងរបស់អ៊ុយក្រែន ចាប់តាំងពីពួកគេបានប្រកាសឯករាជ្យជាការឆ្លើយតបទៅនឹងរដ្ឋប្រហារដែលគាំទ្រដោយលោកខាងលិចនៅទីក្រុងកៀវក្នុងឆ្នាំ ២០១៤ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចិន នឹងដាក់ទណ្ឌកម្មក្រុមហ៊ុន អាមេរិក ជុំវិញការលក់អាវុធឲ្យ តៃវ៉ាន់