ថៃ ព្រមានទោះព្យុះ Noru ចុះកម្លាំង តែជំនន់ទឹកភ្លៀងនៅតែអាចកើតមាន

នាយកដ្ឋានឧតុនិយមថៃបាននិយាយថា ទោះបីជាព្យុះទីហ្វុង Noru បានចុះខ្សោយទៅជាប្រព័ន្ធសម្ពាធទាបក៏ដោយ ប៉ុន្តែវានឹងបន្តនាំមកនូវភ្លៀងធ្លាក់ខ្លាំងនៅថ្ងៃសុក្រនេះជាមួយនឹងការគំរាមកំហែងនៃទឹកជំនន់ផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធាននាយកដ្ឋានលោកស្រី Chomparee Chompurat បាននិយាយថា ព្យុះនេះបានចុះខ្សោយទៅជាប្រព័ន្ធសម្ពាធទាបនៅក្នុងខេត្ត Chaiyaphum ភាគឦសាននៅម៉ោងប្រហែល ៧ យប់ថ្ងៃព្រហស្បតិ៍ ប៉ុន្តែនៅថ្ងៃសុក្រនេះប្រព័ន្ធ​សម្ពាធ​ទាប​របស់ព្យុះនៅតែ​គ្រប​ដណ្តប់​លើ​តំបន់ទំនាប​ភាគ​ខាងជើង ទំនាប​កណ្តាល និង​ភាគ​ឦសានផងដែរ ។

លោកស្រី Chomparee បាននិយាយទៀតថា ទន្ទឹមនឹងខ្យល់មូសុងបោកបក់ដ៏ខ្លាំងក្លា ព្យុះនេះនឹងបង្កឲ្យមានភ្លៀងធ្លាក់ខ្លាំងផងដែរនៅផ្នែកខ្លះទៀតនៃភាគខាងជើង ភាគឦសាន ទំនាបកណ្តាល ភាគខាងកើត និងភាគខាងត្បូងរយៈពេលមួយថ្ងៃទៀត ជាពិសេសអាចកើតមានទឹកហូរហៀរ និងទឹកជំនន់នៅលើជម្រាលភ្នំ និងតំបន់ទំនាប ។

រហូតមកដល់ពេលនេះនៅតែមានភ្លៀងធ្លាក់ឥតឈប់ឈរ និងបានបង្កជាទឹកហូរចេញពីជួរភ្នំ Phu Langka ហើយបានហូរចូលស្រុក Muang នៃខេត្ត Chaiyaphum នៅម៉ោងប្រហែល ៩ យប់ថ្ងៃព្រហស្បតិ៍ ។

ស្របពេលជាមួយគ្នា កម្រិតទឹកជំនន់មានចាប់ពី ៥០ ទៅ ៨០ សង់ទីម៉ែត្រនៅកណ្តាលខេត្តកាលពីយប់ថ្ងៃព្រហស្បតិ៍ ប៉ុន្តែបានស្រកបន្តិចវិញនៅកម្រិត ៥០ ទៅ ៦០ សង់ទីម៉ែត្រកាលពីព្រឹកថ្ងៃសុក្រ ។

គួរបញ្ជាក់ថា ខេត្ត Chaiyaphum គឺជាខេត្តមួយក្នុងចំណោមខេត្តនៅតំបន់ទំនាបកណ្តាល ភាគខាងជើង និងភាគឦសាន ដែលនាយកដ្ឋានបង្ការ និងកាត់បន្ថយគ្រោះមហន្តរាយរំពឹងfaនឹងមានទឹកជំនន់ភ្លាមៗនៅថ្ងៃសុក្រនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ព្យុះ Noru ឆក់យកជីវិតមនុស្សនៅ ថៃ