ប៉ូលិសឥណ្ឌូណេស៊ី រងការរិះគន់ចាស់ដៃ បន្ទាប់ពីហេតុការណ៍ក្នុងកីឡដ្ឋាន សម្លាប់មនុស្ស ១២៥នាក់

ប៉ូលិសឥណ្ឌូណេស៊ី បានរងការរិះគន់យ៉ាងចាស់ដៃកាលពីថ្ងៃអាទិត្យទី០២ខែតុលា បន្ទាប់ពីមនុស្ស១២៥នាក់ បានស្លាប់ក្នុងហេតុការណ៍រត់ជាន់គ្នា នៅកីឡដ្ឋានបាល់ទាត់មួយ ដែលក្រុមប៉ូលិសបានបាញ់ឧស្ម័នបង្ហូរទឹកភ្នែកទៅលើអ្នកគាំទ្រខឹងសម្បា ដែលសម្រុកចូលទីលាន។

ហេតុការណ៍នេះ ក៏បានបណ្តាលឲ្យមនុស្សចំនួន ៣២៣នាក់រងរបួសផងដែរ។

អ្នកគាំទ្រក្រុម Arema FC នៅកីឡដ្ឋាន Kanjuruhan បានសម្រុកចូលទីលានប្រកួត បន្ទាប់ពីក្រុមរបស់ពួកគេចាញ់ក្រុមភ្ញៀវ Persebaya Surabaya ក្នុងលទ្ធផល ៣ ទល់នឹង ២។

ប៉ូលិស ដែលហៅភាពចលាចលនេះថាជាកុបកម្ម បាននិយាយថា ពួកគេព្យាយាមបង្ខំឲ្យអ្នកគាំទ្រ ត្រលប់ទៅកន្លែងអង្គុយវិញ ហើយបានបាញ់ឧស្ម័នបង្ហូរទឹកភ្នែក បន្ទាប់ពីមន្រ្តីពីរនាក់ត្រូវបានសម្លាប់។

យោង​តាម​ប៉ូលិស ជន​រង​គ្រោះ​ជា​ច្រើន​នាក់ ​ត្រូវ​បាន​គេ​ជាន់ ឬថប់ដង្ហើមស្លាប់។

អ្នកនៅរស់រានមានជីវិត បានរៀបរាប់អំពីអ្នកទស្សនាភ័យស្លន់ស្លោនៅក្នុងហ្វូងមនុស្ស ដែលប្រមូលផ្តុំគ្នានៅពេលឧស្ម័នបង្ហូរទឹកភ្នែក ត្រូវបាញ់លើពួកគេ។

មនុស្សម្នាក់បានប្រាប់ AFP ថា “ក្រុមមន្រ្តីបានបាញ់ឧស្ម័នបង្ហូរទឹកភ្នែក មនុស្សបានសម្រុកចេញក្រៅដោយរុញច្រានគ្នាទៅវិញទៅមក ហើយបណ្តាលឲ្យមានជនរងគ្រោះជាច្រើន។ គ្មានអ្វីកើតឡើងទេ មិនមានការបះបោរឡើយ។ ខ្ញុំមិនដឹងថាមានបញ្ហាអ្វីទេ ស្រាប់តែពួកគេបាញ់ឧស្ម័នបង្ហូរទឹកភ្នែក នោះហើយជាអ្វីដែលធ្វើឲ្យខ្ញុំភ្ញាក់ផ្អើល។ តើពួកគេមានគិតពីកុមារ និងស្រ្តីទេ?”

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការលើកលែងទោសអន្តរជាតិ បានអំពាវនាវឲ្យមានការស៊ើបអង្កេតទៅលើមូលហេតុដែលឧស្ម័នបង្ហូរទឹកភ្នែក ត្រូវបានដាក់ពង្រាយនៅក្នុងកន្លែងបិទជិតដោយនិយាយថា វាគួរតែត្រូវបានប្រើនៅពេលដែលវិធីសាស្រ្តផ្សេងទៀតបរាជ័យប៉ុណ្ណោះ។

អភិបាលរងខេត្ត East Java លោក Emil Dardak បានប្រាប់ទូរទស្សន៍ Metro TV កាលពីល្ងាចថ្ងៃអាទិត្យថា មនុស្សយ៉ាងតិច១២៥នាក់បានស្លាប់ ដោយកែតម្រូវតួលេខដែលបញ្ជាក់ដោយមន្ត្រីថាមានអ្នកស្លាប់ ១៧៤នាក់។ នោះគឺដោយសារតែមន្ត្រីរាប់ចំនួនពីរដង។

បន្ទាប់ពីហេតុការណ៍នោះ លោកប្រធានាធិបតី Joko Widodo បានបញ្ជាឲ្យមានការស៊ើបអង្កេតលើសោកនាដកម្មនេះ, ការត្រួតពិនិត្យសុវត្ថិភាពក្នុងការប្រកួតបាល់ទាត់ទាំងអស់ និងបញ្ជាឲ្យសមាគមកីឡាបាល់ទាត់របស់ប្រទេស ផ្អាកការប្រកួតទាំងអស់ រហូតដល់ការកែលម្អសុវត្ថិភាពត្រូវបានធ្វើរួចរាល់។

គួរបញ្ជាក់ថា សោកនាដកម្មកាលពីយប់ថ្ងៃសៅរ៍ នៅទីក្រុង Malang គឺស្ថិតក្នុងចំណោមគ្រោះមហន្តរាយក្នុងកីឡដ្ឋាន ដែលសម្លាប់មនុស្សច្រើនបំផុតលើពិភពលោក។

គ្រោះមហន្តរាយក្នុងកីឡដ្ឋានផ្សេងទៀតរួមមានការប៉ះទង្គិចគ្នាកាលពីឆ្នាំ១៩៨៩ នៅកីឡដ្ឋាន Hillsborough របស់ចក្រភពអង់គ្លេស ដែលបណ្តាលឲ្យអ្នកគាំទ្រក្លិប Liverpool ៩៧ នាក់ស្លាប់ និងសោកនាដកម្មកីឡដ្ឋាន Port Said ឆ្នាំ ២០១២ នៅប្រទេសអេហ្ស៊ីប ដែលមនុស្ស ៧៤ នាក់បានស្លាប់ ក្នុងការប៉ះទង្គិចគ្នា។

នៅឆ្នាំ ១៩៦៤ មនុស្ស៣២០ នាក់បានស្លាប់ និងជាង ១០០០នាក់រងរបួសក្នុងអំឡុងពេលរត់ជាន់គ្នានៅពហុកីឡដ្ឋានជាតិទីក្រុង Lima នៃប្រទេសប៉េរូ៕

ប្រែសម្រួល៖ Vann Vann

ប្រភព៖ CNA

ចុចអាន៖ រត់ជាន់គ្នាស្លាប់ជាង ១២៩ នាក់ក្នុងការប្រកួតបាល់ទាត់នៅ ឥណ្ឌូណេស៊ី