ម្ដាយម៉ាឡេស៊ីម្នាក់ ទិញឡានតម្លៃជិត ៤០ម៉ឺនដុល្លារ ដើម្បីសូកកូនស្រីអាយុ ៥ឆ្នាំ ឱ្យទៅរៀន

ដើម្បីលើកទឹកចិត្តកូនស្រីឱ្យទៅសាលារៀន អ្នកម្តាយវ័យក្មេងនៅប្រទេសម៉ាឡេស៊ីបានធ្វើឱ្យអ្នកលេងអ៊ីនធឺរណិតសម្ដែងការភ្ញាក់ផ្អើល និងហួសចិត្ត ក្រោយពេលពួកគេបានទិញរថយន្តតម្លៃជិត ៤០ម៉ឺនដុល្លារ ជូនជាកាដូក្នុងថ្ងៃខួបកំណើតរបស់នាង។

ជឿថា ឪពុកម្តាយគ្រប់រូបតែងតែចង់ផ្ដល់ឱ្យកូននូវរបស់ល្អបំផុត ទើបបានជាទូទៅឪពុកម្តាយជាច្រើនរមែងទិញ​អំណោយថ្លៃៗ ឬសម្ភារប្រណីតៗឱ្យកូនប្រើប្រាស់។ តួយ៉ាងអ្នកម្តាយដែលជាអ្នកជំនួញម្នាក់ នៅប្រទេសម៉ាឡេស៊ីបានទិញរថយន្តទំនើបតម្លៃប្រមាណ ១.៧លានរីងហ្គីត (ប្រហែល ៣៨៥,០០០ដុល្លារ) ទុកជាកាដូកំណើតឱ្យកូនស្រីអាយុ ៥ឆ្នាំរបស់ខ្លួន ដែលបាននិងកំពុងធ្វើឱ្យបណ្ដាញសង្គមផ្ទុះការចាប់អារម្មណ៍យ៉ាងខ្លាំង។

អំណោយប្រណីតមួយនេះបានធ្វើឲ្យអ្នកនិយមលេងអ៊ីនធឺរណិត សម្ដែងការហួសចិត្តសឹងគ្រប់គ្នា ព្រោះជាអំណោយដែលឪពុកម្ដាយក្មេងស្រីទិញជូននាង ក្នុងបំណងសូកប៉ាន់ឱ្យនាងទៅសាលារៀនប៉ុណ្ណោះ។

អ្នកស្រី Farhana Zahra ដែលជាម្ដាយក្មេងស្រីបាននិយាយថា គាត់ធ្លាប់បញ្ជូនកូនឱ្យទៅសាលារៀន ប៉ុន្តែកូនស្រីតែងតែឈឺ និងថា នាងមិន​ទៅ​សាលា​ទេ ព្រោះ​អាយុ​របស់នាងមិន​ទាន់គ្រប់ ​៥​ឆ្នាំ ហើយនាង​ចង់​មាន​ឡានមួយគ្រឿង ​នៅថ្ងៃគម្រប់ខួបកំណើតទី៥ របស់នាង បន្ទាប់ពីនោះ​នាងទៅទៅ​សាលារៀន។ អ្នកស្រី Farhana Zahra បន្ថែមថា កូនស្រីរបស់គាត់សប្បាយចិត្តណាស់ ព្រោះនាងបានទទួលឡានក្នុងក្ដីស្រមៃរបស់នាង ហើយពេលនេះនាងយកចិត្តទុកដាក់នឹងការសិក្សាខ្លាំងទៀតផង។

ក្រោយទិញកាដូជូនកូនស្រី និងធ្វើឱ្យបណ្ដាញសង្គមរិះគន់រួចមក អ្នកស្រី Farhana Zahra មិនបានឆ្លើយតបអ្វីឡើយ គាត់មានតែនិយាយជូនពរឱ្យបំណងប្រាថ្នារបស់កូនស្រីដែលចង់ធ្វើជាវេជ្ជបណ្ឌិតក្លាយជាការពិត៕

ប្រែសម្រួល៖ សន្យា

ចុចអាន៖ អឺរ៉ុប បញ្ជូនយានអវកាស ទៅរកមនុស្សក្រៅភព

ចុចអាន៖ មួយពាន់ឆ្នាំក្រោយ មនុស្សនឹងប្រែប្រួលរូបរាងដោយសារការប្រើប្រាស់បច្ចេកវិទ្យា