អ៊ុយក្រែន សុំយន្តហោះចម្បាំងពីអាមេរិក ដោយផ្ទាល់

នាយករដ្ឋមន្ត្រីអ៊ុយក្រែនលោក Denys Shmyhal បានស្នើសុំយន្តហោះចម្បាំងពីរដ្ឋមន្ត្រីការពារជាតិអាមេរិកលោក Lloyd Austin ដោយផ្ទាល់ កាលពីថ្ងៃពុធទី១២ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងជាមួយលោក Austin នៅឯមន្ទីរបញ្ចកោណ លោក Shymhal បាននិយាយថា អ៊ុយក្រែនកំពុងបង្កើត “សម្ព័ន្ធយន្តហោះចម្បាំង” ដើម្បីពង្រឹងសមត្ថភាពយោធារបស់ខ្លួន ហើយសហរដ្ឋអាមេរិកនឹងក្លាយជាអ្នកចូលរួមដ៏សំខាន់បំផុត ប្រសិនបើទីក្រុងវ៉ាស៊ីនតោនសម្រេចចិត្តបរិច្ចាគយន្តហោះមែន។

លោកនិយាយថា “នៅក្នុងសង្គ្រាមសម័យទំនើប ឧត្តមភាពដែនអាកាស មានសារសំខាន់ណាស់។ នោះហើយជាមូលហេតុដែលអ៊ុយក្រែនកំពុងផ្តួចផ្តើមបង្កើតនូវអ្វីដែលគេហៅថា “សម្ព័ន្ធយន្តហោះចម្បាំងថ្មី” ហើយយើងកំពុងអញ្ជើញសហរដ្ឋអាមេរិកឲ្យក្លាយជាអ្នកចូលរួមដ៏សំខាន់បំផុត។ អាមេរិកអាចបង្ហាញភាពជាអ្នកដឹកនាំរបស់ខ្លួនម្តងទៀត ដោយផ្តល់ឲ្យអ៊ុយក្រែននូវយន្តហោះ F-15 ឬ F-16”។

បន្ថែមពីលើយន្តហោះ F-15 និង F-16 លោក Shymhal និយាយថា អ៊ុយក្រែនក៏ត្រូវការប្រព័ន្ធការពារអាកាសបន្ថែមទៀតផងដែរ ដើម្បីការពារប្រឆាំងនឹងការវាយប្រហាររបស់រុស្ស៊ី។

ទោះបីជាយ៉ាងណាក៏ដោយ លោក Austin មិនបានឆ្លើយតបច្បាស់ៗចំពោះសំណើរបស់អ៊ុយក្រែនសម្រាប់យន្តហោះចម្បាំងដោយផ្ទាល់ទេ ប៉ុន្តែនិយាយថា សហរដ្ឋអាមេរិក នឹងបំពេញតម្រូវការផ្នែកការពាររបស់អ៊ុយក្រែននៅនិទាឃរដូវ និងផុតពីនេះ។

គួរបញ្ជាក់ថា សំណើរបស់អ៊ុយក្រែន ធ្វើឡើងចំពេលកងកម្លាំងទីក្រុងកៀវ រៀបចំសម្រាប់ការវាយលុកនិទាឃរដូវ ដើម្បីដណ្តើមមកវិញនូវទឹកដីដែលរុស្ស៊ីកាន់កាប់ នៅភាគខាងត្បូងនិងខាងកើត៕

ប្រែសម្រួល៖ Vann Vann

ប្រភព៖ AA

ចុចអាន៖ មកស្គាល់ យន្តហោះចម្បាំង F-16 ដ៏មានឥទ្ធិពលរបស់ អាមេរិក ដែល អ៊ុយក្រែន កំពុងទទូចចង់បាន