រុស្ស៊ី រ៉ាប់រងចិញ្ចឹមក្រុមហ៊ុនទាហានស៊ីឈ្នួល Wagner, មួយឆ្នាំៗ ផ្តល់ប្រាក់រាប់ពាន់លានដុល្លារ 

ក្រុមហ៊ុនទាហានស៊ីឈ្នួល Wagner គឺពឹងផ្អែកទាំងស្រុងលើការគាំទ្រពីរដ្ឋ។ នេះបើតាមការបញ្ជាក់របស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន ប្រាប់ទៅកិច្ចប្រជុំជាមួយមេបញ្ជាការយោធានៅក្នុងវិមានក្រឹមឡាំងកាលពីថ្ងៃអង្គារទី២៧ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា យន្តហោះចម្បាំងរបស់ក្រុមហ៊ុនយោធាឯកជនមួយនេះ ត្រូវបានផ្គត់ផ្គង់ និងចេញថ្លៃដោយកញ្ចប់ថវិកាក្រសួងការពារជាតិ និងរដ្ឋ។

លោកប្រធានាធិបតីបានបង្ហាញឲ្យដឹងថា នៅចន្លោះខែឧសភា ឆ្នាំ២០២២ ដល់ខែឧសភា ឆ្នាំ២០២៣ អាជ្ញាធររុស្ស៊ីបានផ្តល់លុយចំនួន ១.០៤ ពាន់លានដុល្លារ សម្រាប់ប្រាក់ខែ និងប្រាក់លើកទឹកចិត្តឲ្យអ្នកប្រយុទ្ធ Wagner។

ទន្ទឹមនឹងនេះដែរ ស្ថាបនិកក្រុម Wagner លោក Yevgeny Prigozhin ដែលជាម្ចាស់ក្រុមហ៊ុនម្ហូបអាហារ Concord ក៏ទទួលបានប្រាក់រាប់ពាន់លានដុល្លារលើកិច្ចសន្យារដ្ឋផងដែរ។

លោកប្រធានាធិបតីនិយាយថា “នៅពេលក្រុម Wagner Group ពឹងផ្អែកលើរដ្ឋ ម្ចាស់ក្រុមហ៊ុន Concord បានទទួលប្រាក់ ៩៦០ លានដុល្លារពីរដ្ឋក្នុងមួយឆ្នាំ ដោយការផ្គត់ផ្គង់ផលិតផលអាហារដល់កងទ័ព”។

កាលពីថ្ងៃសៅរ៍ ទី២៤ ខែមិថុនា ក្រុមទាហានស៊ីឈ្នួល Wagner បានចាប់ផ្តើមការបះបោរដ៏ធំមួយ តាមបញ្ជារបស់ប្រធាន Yevgeny Prigozhin ។ កងទ័ព​បាន​ដណ្តើម​កាន់កាប់​ទីស្នាក់ការ​កណ្តាល​នៃស្រុកខាងត្បូងរបស់​យោធា​រុស្ស៊ី​ក្នុង​ទីក្រុង Rostov-on-Don ហើយឆ្ពោះដំណើរទៅមូស្គូ។

ក្រោយមក ការបះបោរបានបញ្ឈប់ ខណៈលោក Prigozhin ប្រកាសថាក្រុមទាហានរបស់គាត់ នឹងវិលត្រលប់ទៅជំរំរបស់ពួកគេវិញ បន្ទាប់ពីកិច្ចពិភាក្សាជាមួយប្រធានាធិបតីបេឡារុសលោក Alexander Lukashenko៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន ទទួលស្គាល់ថា អ្នកបើកយន្តហោះរុស្ស៊ីស្លាប់ ក្នុងការបះបោររបស់ក្រុមទាហានស៊ីឈ្នួល