តើពេលណាទើបជម្លោះ រុស្ស៊ី-អ៊ុយក្រែន បញ្ចប់?

អតីតប្រធានាធិបតីរុស្ស៊ី លោក Dmitry Medvedev បានព្រមានថា អរិភាពរវាងរុស្ស៊ីនិងអ៊ុយក្រែន អាចអូសបន្លាយពេលរាប់ឆ្នាំ ឬរាប់ទសវត្សរ៍ទៀតឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ប្រទេសរុស្ស៊ី វាគឺជាជម្លោះអត្ថិភាពនិងការប្រយុទ្ធ ដើម្បីអត្ថិភាពរបស់ខ្លួន។ នេះបើតាមការបង្ហោះសារលើ Telegram របស់លោក Medvedev ដែលបច្ចុប្បន្នជាអនុប្រធានក្រុមប្រឹក្សាសន្តិសុខរុស្ស៊ី។ រុស្ស៊ីត្រូវតែបំផ្លាញនិងរុះរើទាំងស្រុងនូវរដ្ឋអ៊ុយក្រែន ដែលជារដ្ឋភេរវករ ដោយធ្វើឲ្យប្រាកដថា ភាពខ្មៅកខ្វក់នេះ នឹងមិនកើតឡើងម្តងទៀតឡើយ។

លោកសរសេរថា “វាគួរតែចំណាយពេលរាប់ឆ្នាំឬរាប់ទសវត្សរ៍។ យើង​គ្មាន​ជម្រើស​ឡើយ បើ​យើងមិន​បំផ្លាញ​របប​នយោបាយ​អរិភាព​របស់​ពួក​គេទេនោះ ​នៅ​ទី​បំផុត ​លោក​ខាង​លិច​នឹង​ហែក​រុស្ស៊ី​ជា​បំណែកៗ ហើយក្នុងករណីនេះគេនឹងវិនាសជាមួយយើង”។

ផ្ទុយទៅវិញ យោងតាមលោក Medvedev, សម្រាប់លោកខាងលិច អរិភាពដែលកំពុងបន្តគឺជាសង្រ្គាមចម្លែក ហើយការគាំទ្ររបស់ពួកគេចំពោះសង្គ្រាម មិនអាចស្ថិតស្ថេរជារៀងរហូតបាននោះទេ។ ​ជាមួយ​វិធីសាស្ត្រ​នៃ​ជម្លោះ​បែប​នេះ លោក​ខាង​លិច​នឹង​ត្រូវ​បញ្ចប់​ដោយ​ការ​ចាញ់។

ក្នុងអំឡុងពេលនៃជម្លោះនេះ ប្រទេសលោកខាងលិចបានផ្តល់ជំនួយផ្នែកយោធា និងសេដ្ឋកិច្ចយ៉ាងច្រើនទៅឲ្យអ៊ុយក្រែន ដោយមានមន្ត្រីកំពូលៗជាច្រើន បាននិយាយម្តងហើយម្តងទៀតថា ពួកគេចង់ឃើញរុស្ស៊ីចាញ់នៅលើសមរភូមិ។

ទោះបីជាយ៉ាងណាក៏ដោយ ទីក្រុងមូស្គូបានជំរុញដល់លោកខាងលិច ឲ្យបញ្ឈប់ការផ្តល់សព្វាវុធ ដោយព្រមានថា ការធ្វើដូច្នេះគ្រាន់តែអូសបន្លាយអរិភាព និងធ្វើឲ្យអ៊ុយក្រែនកាន់តែវេទនាប៉ុណ្ណោះ៕

ប្រែសម្រួល៖ Vann Vann

ប្រភព៖ Mehr News

ចុចអាន៖ រុស្ស៊ី ធានា ចេញមុខសងសឹកជួស បើអ្នកណាហ៊ានវាយប្រហារសម្ព័ន្ធមិត្តរបស់ខ្លួន