ប្រជាជនមីយ៉ាន់ម៉ារាប់ពាន់នាក់ ចេញមកធ្វើបាតុកម្មគាំទ្រកងទ័ព

អ្នកគាំទ្រកងទ័ពរាប់ពាន់នាក់បានចេញមកប្រមូលផ្តុំគ្នានៅឯឧទ្យានប្រជាជនកាលពីម្សិលមិញនេះ ដើម្បីបង្ហាញការគាំទ្ររបស់ពួកគេចំពោះការប្រកាសដាក់ប្រទេសក្នុងគ្រាអាសន្នកាលពីថ្ងៃទី០១ខែកុម្ភៈ។

អ្នកគាំទ្របានធ្វើបាតុកម្មនៅខាងក្នុងឧទ្យានថ្វីបើឧទ្យាននេះត្រូវបានបិទ ជាវិធានការដើម្បីការពារការរីករាលដាលនៃជំងឺកូវីដ១៩ក៏ដោយ។

ធុងបាស់ជាច្រើនបានបើកសំឡេងឮៗ ជាសកម្មភាពគាំទ្រយោធា។

បាតុករនិយាយថា ពួកគេនឹងច្រានចោលការជ្រៀតជ្រែកពីបរទេសហើយគាំទ្ររដ្ឋាភិបាល ដែលបង្កើតឡើងដោយកងទ័ព។

ប្រជាជននៅក្នុងតំបន់ Hmawbi, Taikkyi, Hlegu, Mingalardon និង Insein បានជិះរថយន្តរាប់រយគ្រឿងមកចូលរួមក្នុងព្រឹត្តិការណ៍នេះ ដែលជាហេតុបង្កឲ្យមានការកកស្ទះចរាចរណ៍នៅខាងមុខឧទ្យាន។

នៅក្នុងសេចក្តីថ្លែងការណ៍មួយកាលពីម្សិលមិញ សមាគមពុទ្ធសាសនាដ៏មានឥទ្ធិពលរបស់ប្រទេស មីយ៉ាន់ម៉ា បានប្តេជ្ញាគាំទ្ររដ្ឋាភិបាលដែលបង្កើតឡើងដោយយោធា។

សេចក្តីថ្លែងការណ៍នោះនិយាយថា ពួកគេនឹងឈរជាមួយកងទ័ពដើម្បីការពារជាតិសាសន៍ សាសនានិងការអប់រំ ហើយទទួលយករដ្ឋាភិបាលដែលទើបបង្កើតថ្មី៕

ប្រែសម្រួលដោយ៖ Vann Vann

ប្រភព៖ Myanmar Times

ចុចអាន៖ វីដេអូប្រជាជនមីយ៉ាន់ម៉ាស៊ីផ្លេឡាន និងគោះចានគោះឆ្នាំង លាន់ទ្រហឹងពេញទីក្រុងយ៉ាំងហ្គោនប្រឆាំងរដ្ឋប្រហារ