ទោះយោធាដកអាជ្ញាប័ណ្ណ តែប្រព័ន្ធផ្សព្វផ្សាយមីយ៉ាន់ម៉ានៅតែបន្តរាយការណ៍ព័ត៌មានតាមអ៊ីនធឺណិត

ប្រព័ន្ធផ្សព្វផ្សាយនៅក្នុងប្រទេសមីយ៉ាន់ម៉ានៅតែបន្តរាយការណ៍អំពីការតវ៉ាទូទាំងប្រទេសប្រឆាំងនឹងរដ្ឋប្រហារយោធាកាលពីខែមុន ទោះបីជាមានការដកហូតអាជ្ញាប័ណ្ណក៏ដោយ ។

ប្រព័ន្ធផ្សព្វផ្សាយរដ្ឋរបស់ប្រទេសមីយ៉ាន់ម៉ាបានរាយការណ៍ថា ក្រុមហ៊ុនប្រព័ន្ធផ្សព្វផ្សាយចំនួន ៥ នោះរួមមាន គេហទំព័រ Myanmar Now, សារព័ត៌មាន Khit Thit, វិទ្យុសម្លេងប្រជាធិបតេយ្យភូមា (DVB), ទូរទស្សន៍ Mizzima និងសារព័ត៌មាន 7 Day ខណៈដែលទូរទស្សន៍ Mizzima និងសារព័ត៌មាន 7 Day គឺជាសាខារបស់វិទ្យុ VOA ។

ប៉ុន្តែរហូតមកពេលនេះប្រព័ន្ធផ្សព្វផ្សាយចំនួន ៤ ក្នុងពួកគេនៅតែផ្តល់ព័ត៌មានតាមអ៊ីនធឺណិតនៅថ្ងៃអង្គារនេះ ។

សារព័ត៌មាន Mizzima បានបង្ហោះពីសេចក្តីថ្លែងការណ៍មួយដោយនិយាយថា ក្នុងនាមជាក្រុមហ៊ុនប្រព័ន្ធផ្សព្វផ្សាយឯករាជ្យនឹងបន្តប្រយុទ្ធប្រឆាំងនឹងរដ្ឋប្រហារយោធា និងសម្រាប់ការស្តារលទ្ធិប្រជាធិបតេយ្យ និងសិទ្ធិមនុស្សនៅក្នុងប្រទេសមីយ៉ាន់ម៉ា ខណៈប្រព័ន្ធផ្សព្វផ្សាយពីរផ្សេងទៀតក៏បានបង្ហោះសារស្រដៀងគ្នានេះផងដែរ ។

យោធាបានឃុំខ្លួនអ្នកសារព័ត៌មានដែលផ្សាយអំពីការតវ៉ា ហើយបានព្រមានប្រព័ន្ធផ្សព្វផ្សាយកុំប្រើពាក្យថា “រដ្ឋប្រហារ” ។

ដូច្នេះយោធាអាចចាត់វិធានការដើម្បីបញ្ឈប់ការផ្សព្វផ្សាយដូចជាការរឹបអូសការិយាល័យរបស់ប្រព័ន្ធផ្សព្វផ្សាយ ឬការឃុំខ្លួនអ្នកកាសែត និងបុគ្គលិកផ្សេងទៀតជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK