ប្រធានាធិបតីកូរ៉េខាងត្បូង ប្រឈមទោសប្រហារជីវិត

ស្ថានភាពនយោបាយក្នុងប្រទេសកូរ៉េខាងត្បូង នៅតែជាប់គាំងក្នុងវិបត្តិយ៉ាងជ្រៅ ដោយពេលនេះ ប៉ូលិសបានបើកការស៊ើបអង្កេតលើលោកប្រធានាធិបតី Yoon Suk Yeol ជុំវិញការចោទប្រកាន់ពីបទ បំបះបំបោរឬអាចថាជាការក្បត់ជាតិ ហើយប្រសិនបើរកឃើញថា លោកពិតជាប្រព្រឹត្តខុសមែន លោកអាចទទួលទោសប្រហារជីវិត ព្រោះថា តាមច្បាប់កូរ៉េខាងត្បូង ការបះបោរគឺជាឧក្រិដ្ឋកម្មដែលហួសពីអភ័យឯកសិទ្ធិប្រធានាធិបតី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃព្រហស្បតិ៍ទី៥ខែធ្នូឆ្នាំ២០២៤ ការស៊ើបអង្កេតរបស់ប៉ូលិសលើលោក Yoon គឺធ្វើឡើងបន្ទាប់ពីគណបក្សប្រឆាំងដាក់ពាក្យបណ្តឹងប្រឆាំងប្រធានាធិបតីកូរ៉េខាងត្បូងនិងមន្ត្រីធំៗមួយចំនួនទៀត ដែលចូលដៃជើងគ្នាប្រកាសច្បាប់អាជ្ញាសឹក នាំឲ្យប្រទេសកើតចលាចល។

ការបះបោរគឺជាឧក្រិដ្ឋកម្មមួយក្នុងចំណោមឧក្រិដ្ឋកម្មមួយចំនួនដែលមិនត្រូវបានធានាដោយអភ័យឯកសិទ្ធិអតីតមន្ត្រីរបស់ប្រធានាធិបតីទេ ដូចនេះបើអ្នកណាប្រព្រឹត្តខុស បើមិនទទួលទោស​ប្រហារជីវិត ក៏ត្រូវជាប់​ពន្ធនាគារ​អស់​មួយ​ជីវិតផងដែរ។

ប្រសិនបើត្រូវបានចោទប្រកាន់មែន លោក Yoon នឹងក្លាយជាប្រធានាធិបតីកូរ៉េខាងត្បូងកាន់តំណែងដំបូងគេ ដែលត្រូវបានកាត់ទោសនៅក្នុងតុលាការព្រហ្មទណ្ឌ។

មុននេះ គណបក្សប្រឆាំងកូរ៉េខាងត្បូង គឺគណបក្សប្រជាធិបតេយ្យ ក៏បានដាក់ញត្តិប្តឹងដកតំណែងលោក Yoon ផងដែរដោយប្រកាសថា លោក Yoon មិនរួចខ្លួនទេ គាត់ត្រូវតែចុះចេញពីតំណែង ឬត្រូវចាប់ខ្លួនគាត់ឲ្យបាន ហើយទោះក្រោយគាត់លាលែងមែន ក៏គាត់ត្រូវតែប្រឈមនឹងការចោទប្រកាន់ពីបទក្បត់ជាតិដែរ។

ក្នុងប្រវត្តិសាស្រ្តកូរ៉េខាងត្បូង ពោលគឺក្នុងឆ្នាំ១៩៩៦ អតីតប្រធានាធិបតី Chun Doo-hwan ក៏ត្រូវបានកាត់ទោសប្រហារជីវិតផងដែរពីបទក្បត់ជាតិ ក្រោយពេលចុះចេញពីតំណែង។ 

គាត់គឺជាមេខ្លោងនៅពីក្រោយការបះបោរ Gwangju ឆ្នាំ១៩៨០ ដែលរដ្ឋាភិបាលរបស់លោក បានបើកការបង្ក្រាបលើបាតុកម្មគាំទ្រលទ្ធិប្រជាធិតេយ្យ បណ្តាលឲ្យជនស៊ីវិលរាប់រយនាក់ បាត់បង់ជីវិត។

យ៉ាងណា ក្រោយមក ទោសរបស់គាត់ត្រូវបន្ថយមកនៅត្រឹមជាប់ពន្ធនាគារអស់មួយជីវិត ដោយគេយល់ឃើញថា គាត់ក៏រួមចំណែកអភិវឌ្ឍន៍សេដ្ឋកិច្ច និងផ្សះផ្សាជាតិដែរ។

ងាកទៅលោក Yoon វិញ, សូមជម្រាបជាថ្មី កាលពីរាត្រីថ្ងៃអង្គារ គាត់បានបង្កការភ្ញាក់ផ្អើល ដោយប្រកាសច្បាប់អាជ្ញាសឹកយ៉ាងបន្ទាន់ជាទីបំផុត ដោយអះអាងថា នេះជារឿងចាំបាច់ក្នុងការការពារប្រទេសពីក្រុមបក្សពួកកូរ៉េខាងជើងនិងកម្លាំងប្រឆាំងរដ្ឋ។ ការធ្វើបែបនេះ គឺដើម្បីដកកងកម្លាំងគាំទ្រកូរ៉េខាងជើងចេញពីប្រទេស និងដើម្បីការពារសណ្តាប់ធ្នាប់រដ្ឋធម្មនុញ្ញសេរី។ លោកគ្មានជម្រើសអ្វីក្រៅពីងាកទៅរកច្បាប់អាជ្ញាសឹកឡើយ។ ប៉ុន្តែច្បាប់នោះមានដាក់បានត្រឹម២ម៉ោងប៉ុណ្ណោះ រួចក៏ដកចេញវិញ។

អ្នកជំនាញអះអាងថា មូលហេតុដែលលោកប្រកាសច្បាប់នេះ ព្រោះមើលឃើញស្ថានការណ៍ថា ខ្លួនកំពុងចាញ់ប្រៀបគណបក្សប្រឆាំងក្នុងរឿងនយោបាយរបស់ប្រទេស ហើយច្បាប់នោះទៀតសោត ត្រូវគេបរិហាថា ជាការប្រាសចាករដ្ឋធម្មនុញ្ញ៕

អត្ថបទ៖ សុខ សុវណ្ណ

ចុចអាន៖ ប្រធានាធិបតីកូរ៉េខាងត្បូង តែងតាំងអតីតមេទ័ព ជារដ្ឋមន្ត្រីការពារជាតិថ្មី