បំណាក់ដី និងទឹកជំនន់ភ្លាម​ៗ​ នៅ​កោះ Java ឥណ្ឌូណេស៊ី បង្ក​មហន្តរាយ​និង​១០នាក់ស្លាប់​

ក្រុមអ្នកជួយសង្គ្រោះឥណ្ឌូណេស៊ីបានរកឃើញសាកសពចំនួន​១០នាក់ ដែលត្រូវបានទឹកជំនន់ភ្លាមៗកួច​ទៅកប់នៅក្រោមភក់ និងថ្មជាច្រើន​ភូមិភ្នំនៅលើកោះ Java ដ៏សំខាន់របស់ប្រទេសនេះ ខណៈមនុស្សពីរនាក់នៅតែបាត់ខ្លួន​នៅឡើយ​។ នេះបើយោងតាមកាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១០ខែធ្នូនេះ។

វរសេនីយ៍ទោលោក Yudi Hariyanto ដែលដឹកនាំការជួយសង្គ្រោះបាននិយាយថា ភ្លៀងធ្លាក់ខ្លាំងចាប់តាំងពីសប្តាហ៍មុន បានបណ្តាលឱ្យទឹកទន្លេកើនឡើងបាក់ច្រាំងទន្លេ ហូរកាត់ភូមិជាង១៧០ក្នុងស្រុក Sukabumi នៃខេត្ត Java ខាងលិច ខណៈដែលភក់ ថ្ម និងដើមឈើបានដួលរលំសង្កត់ភូមិតាមភ្នំ។

លោក Hariyanto បាននិយាយថា បំណាក់ដី ទឹកជំនន់ភ្លាមៗ និងខ្យល់បក់ខ្លាំងបានបំផ្លិចបំផ្លាញភូមិចំនួន​១៧២ និងបង្ខំមនុស្សជាង ៣០០០នាក់ ឱ្យភៀសខ្លួនទៅកាន់ទីជម្រកបណ្តោះអាសន្នរបស់រដ្ឋាភិបាល។ អាជ្ញាធរបានព្រមានមនុស្សជិត ១០០០នាក់ឱ្យជម្លៀសចេញ ខណៈដែលផ្ទះជាង ៤០០​ខ្នងត្រូវបានគំរាមកំហែងដោយអាកាសធាតុអាក្រក់នេះ។

គ្រោះមហន្តរាយនេះក៏បានបំផ្លាញស្ពានចំនួន ៣១ ផ្លូវ ៨១ខ្សែ និងវាលស្រែចំនួន ១៣៣២ ហិចតា ខណៈដែលផ្ទះចំនួន១១៧០ ត្រូវបានជន់លិចរហូតដល់ដំបូល។ ទីភ្នាក់ងារគ្រប់គ្រងគ្រោះមហន្តរាយក្នុងតំបន់បាននិយាយថា អាកាសធាតុអាក្រក់ក៏បានបំផ្លាញផ្ទះ និងអគារជាង ៣៣០០ផ្សេងទៀតផងដែរ។

បើវីដេអូដែលផ្សព្វផ្សាយនៅលើប្រព័ន្ធផ្សព្វផ្សាយសង្គមបានបង្ហាញពីទឹកជំនន់ភ្លាមៗដែលបណ្តាលមកពីភ្លៀងធ្លាក់ខ្លាំងនៅ Sukabumi បានបោកបក់ស្ទើរតែគ្រប់អ្វីៗទាំងអស់នៅក្នុងផ្លូវរបស់ពួកគេ រួមទាំងរថយន្ត ម៉ូតូ ក្របី និងគោ ខណៈទឹកទន្លេរប្តូរទៅជាពណ៌ត្នោត ភូមិនានាគ្របដណ្ដប់ដោយភក់ក្រាស់ៗ ថ្ម និងដើមឈើដួលរលំ។

គួរបញ្ជាក់ថាភ្លៀងធ្លាក់តាមរដូវចាប់ពីខែតុលា ដល់ខែមីនា ជារឿយៗបណ្តាលឱ្យមានទឹកជំនន់ និងបំណាក់ដីនៅក្នុងប្រទេសឥណ្ឌូណេស៊ី ដែលជាប្រជុំកោះចំនួន ១៧០០០ដែលមានប្រជាជនរាប់លាននាក់រស់នៅក្នុងតំបន់ភ្នំ ឬនៅជិតតំបន់ទំនាបទឹកជំនន់ដែលជាដីមានជីជាតិ។

កាលពីខែមុន បំណាក់ដី និងទឹកជំនន់ភ្លាមៗ ដែលបង្កឡើងដោយភ្លៀងធ្លាក់ខ្លាំងបានវាយប្រហារខេត្តស៊ូម៉ាត្រាខាងជើង នៃប្រទេសឥណ្ឌូណេស៊ី ក៏បានបណ្តាលឲ្យមនុស្ស ២០នាក់ស្លាប់ និង២នាក់បាត់ខ្លួនផងដែរ៕

អត្ថបទ៖ ប៊ុន សុភាព