អាមេរិក បង្ហាញផែនការសន្តិភាព៧ចំណុច ដែលដាក់សម្ពាធខ្លាំងលើអ៊ុយក្រែន 

តាំងពីដំបូងមក ប្រធានាធិបតីអាមេរិក ដូណាល់ ត្រាំ តែងអួតអាងថានឹងបញ្ចប់សង្គ្រាមរុស្ស៊ី-អ៊ុយក្រែន ឲ្យបានក្នុងរយៈពេលត្រឹម២៤ម៉ោង ប៉ុន្តែរហូតមកទល់ពេលនេះ បុរសវ័យ៧៨ឆ្នាំ ចូលអង្គុយកៅអីសេតវិមានបានជិត១០០ថ្ងៃហើយ នៅតែមិនទាន់អាចដោះស្រាយជម្លោះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្មាននរណាដឹងឡើយថាតើលោកត្រាំ មានវិធីសាស្រ្តអ្វីទើបអាចពន្លត់ភ្លើងសង្គ្រាមដែលឆាបឆេះយ៉ាងសន្ធោសន្ធៅក្នុងពេលដ៏ខ្លីបែបនេះបាន។ យ៉ាងណា ឥឡូវផែនការសន្តិភាព៧ចំណុចកំពុងស្ថិតក្នុងដៃប្រេសិតពិសេស Keith Kellogg សម្រាប់យកទៅបង្ហាញក្នុងកិច្ចប្រជុំកំពូលស្តីពីវិបត្តិអ៊ុយក្រែន ដែលរៀបចំឡើងនៅទីក្រុងឡុងដ៍ នៃចក្រភពអង់គ្លេស ប៉ុន្តែគេដឹងច្បាស់ថា ក្នុងផែនការនោះគឺដាក់សម្ពាធខ្លាំងទៅខាងអ៊ុយក្រែន។

តើ៧ចំណុចនៅក្នុងផែនការនោះមានអ្វីខ្លះ?

1. ការទទួលស្គាល់តំបន់គ្រីមៀ ជាទឹកដីរុស្ស៊ី៖ សំណើរបស់សហរដ្ឋអាមេរិក រួមមានការទទួលស្គាល់ជាផ្លូវការនៃឧបទ្វីបគ្រីមៀរបស់រុស្ស៊ី ដែលផ្ទុយពីគោលនយោបាយមុនរបស់អាមេរិក។
2. ផ្អាកការវាយលុកនៅខ្សែបន្ទាត់ជួរមុខបច្ចុប្បន្ន៖ ផែនការនេះស្នើឲ្យរក្សាខ្សែទឹកដីបច្ចុប្បន្ន ដោយទទួលស្គាល់ការគ្រប់គ្រងរបស់រុស្ស៊ីប្រកបដោយប្រសិទ្ធភាព លើតំបន់ដែលរុស្ស៊ីកាន់កាប់ចាប់តាំងពីការវាយលុកឆ្នាំ២០២២មក។
3. សមាជិកភាណអង្គការ ណាតូ របស់អ៊ុយក្រែន៖ សំណើនេះតម្រូវឲ្យអ៊ុយក្រែន បោះបង់ចោលឈប់ចង់ចូលជាសមាជិកអង្គការណាតូទៀត ទោះនេះជាគោលដៅរបស់អ៊ុយក្រែន ជាយូរមកហើយក៏ដោយ
4. បន្ថយទណ្ឌកម្មលើរុស្ស៊ី៖ ជាថ្នូរឲ្យរុស្ស៊ីទន់ចិត្ត ផែនការនេះស្នើឲ្យមានការបន្ធូរបន្ថយបន្តិចម្តងៗនូវទណ្ឌកម្មសេដ្ឋកិច្ចដែលដាក់លើរុស្ស៊ី។
5. ការធានាសុវត្ថិភាពសម្រាប់អ៊ុយក្រែន៖ ផែនការនេះបាននិយាយអំពីការផ្តល់ការធានាសន្តិសុខជាក់លាក់ដល់អ៊ុយក្រែន ហើយក៏មានលទ្ធភាពនៃការដាក់កងរក្សាសន្តិភាពផងដែរ។
6. កិច្ចខិតខំប្រឹងប្រែងរួមគ្នាក្នុងការកសាងឡើងវិញ៖ សហរដ្ឋអាមេរិកបានស្នើឲ្យប្រមូលមូលនិធិរួមគ្នាសម្រាប់ការកសាងអ៊ុយក្រែនឡើងវិញ ហើយនោះគឺពាក់ព័ន្ធនឹងការទទួលបានធនធានរ៉ែកម្ររបស់អ៊ុយក្រែន។
7. ពេលវេលាសម្រាប់ការឆ្លើយតប៖ អ៊ុយក្រែនត្រូវគេកំណត់ពេល ក្នុងការឆ្លើយតបទៅនឹងសំណើទាំងប៉ុន្មានខាងលើ ហើយសហរដ្ឋអាមេរិកអាចនឹងដកខ្លួនចេញពីការចរចា ប្រសិនអ្វីៗមិនទទួលបានផល៕

អត្ថបទ៖ សុខ សុវណ្ណ

ចុចអាន៖ ត្រាំ ព្រមានថា អ៊ុយក្រែន អាចអស់ប្រទេសទាំងមូល បើមិនព្រមចរចាជាមួយរុស្ស៊ី