ត្រាំ បញ្ជាឲ្យបើកពន្ធនាគារល្បីឈ្មោះមួយឡើងវិញ ដើម្បីដាក់ឧក្រិដ្ឋជនសាហាវឃោរឃៅ

ក្រោយបិទអស់រយៈពេលជាង៦០ឆ្នាំ ពេលនេះប្រធានាធិបតីអាមេរិក ដូណាល់ ត្រាំ បានបញ្ជាឲ្យបើកពន្ធនាគារសហព័ន្ធ Alcatraz ឡើងវិញ ហើយថែមទាំងពង្រីកឲ្យធំជាងមុនផងដែរ ដើម្បីដាក់ឧក្រិដ្ឋជនសាហាវៗឃោរឃៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពន្ធនាគារ Alcatraz មានទីតាំងនៅលើកោះតូចមួយក្នុងទីក្រុង San Francisco នៃរដ្ឋ California។ វាជាអតីតបន្ទាយទាហាននិងគុកនៅឈូងសមុទ្រ San Francisco ប៉ុន្តែត្រូវប្រែក្លាយទៅជាពន្ធនាគា​រសហព័ន្ធក្នុងឆ្នាំ១៩៣៤។

យោងតាមការិយាល័យពន្ធនាគារសហរដ្ឋអាមេរិកហៅកាត់ BOP, Alcatraz ត្រូវបានបិទនៅឆ្នាំ១៩៦៣ ដោយសារការចំណាយខ្ពស់ពេក ក្រោយប្រតិបត្តិការអស់រយៈពេល២៩ឆ្នាំ។

ទោះបីជាយ៉ាងណាក៏ដោយ ឥឡូវនេះលោក ត្រាំ បានបញ្ជាឲ្យបើកវាឡើងវិញដោយបង្ហោះលើបណ្តាញសង្គម Truth Social កាលពីថ្ងៃទី៤ខែឧសភាឆ្នាំ២០២៥ថា «ត្រូវតែស្តារនិងបើក Alcatraz ឡើងវិញ។ ពេលណាយើងជាប្រទេសតឹងរ៉ឹងជាងឥឡូវ យើងមិនស្ទាក់ស្ទើរឡើយក្នុងការឃុំឃាំងឧក្រិដ្ឋជនដ៏គ្រោះថ្នាក់បំផុត ហើយដាក់ពួកគេឲ្យនៅឆ្ងាយពីអ្នកដែលពួកគេអាចធ្វើបាប។ នោះជាអ្វីដែលត្រូវធ្វើ! ដូច្នេះហើយ ខ្ញុំបានបញ្ជាឲ្យ BOP រួមជាមួយក្រសួងយុត្តិធម៌, FBI និងក្រសួងសន្តិសុខមាតុភូមិ ឲ្យបើក Alcatraz ឡើងវិញ ហើយពង្រីក និងជួសជុលកន្លែងនេះ»។

ពាក់ព័ន្ធបញ្ហានេះ BOP មិនទាន់ចេញមុខបកស្រាយឬឆ្លើយតបចំពោះការសុំអត្ថាធិប្បាយនោះទេ។

សូមជម្រាបថា ពន្ធនាគារ Alcatraz មានសមត្ថភាពផ្ទុកអ្នកទោសបានត្រឹមតែ៣៣៦នាក់ប៉ុណ្ណោះ ប៉ុន្តែវាធ្លាប់ជាកន្លែងឃុំឃាំងឧក្រិដ្ឋជនល្បីឈ្មោះ រួមទាំងមេក្រុមម៉ាហ្វីយ៉ា Al Capone ផងដែរ។ យ៉ាងណា កន្លែងនេះមិនដែលដាក់អ្នកទោសពេញដល់ ៣៣៦នាក់ទេ។

ចាប់តាំងពីការបិទមក Alcatraz បានក្លាយជាចំណុចទាក់ទាញទេសចរ ដ៏ល្បីល្បាញមួយរបស់ទីក្រុង San Francisco៕

អត្ថបទ៖ សុខ សុវណ្ណ

ចុចអាន៖ ម៉ិកស៊ិក ច្រានចោល​សំណើ​របស់ ត្រាំ ដែល​ចង់​ដាក់​ពង្រាយកងទ័ពអាមេរិក​​​លើ​ទឹកដី​ខ្លួន