អង្គការសិទ្ធិមនុស្ស៖ អ៊ីស្រាអែលសម្លាប់មនុស្ស ៦៣៩នាក់ និងរបួស ១ ៣២៩នាក់ នៅអ៊ីរ៉ង់ 

អង្គការសិទ្ធិមនុស្សមានមូលដ្ឋាននៅសហរដ្ឋអាមេរិក បានចេញរបាយការណ៍ថា គិតត្រឹមថ្ងៃព្រហស្បតិ៍ទី១៩ខែមិថុនាឆ្នាំ២០២៥ ការវាយប្រហាររបស់អ៊ីស្រាអែលលើប្រទេសអ៊ីរ៉ង់ បានសម្លាប់មនុស្ស៦៣៩នាក់ ខណៈ១ ៣២៩នាក់រងរបួស ហើយក្នុងចំណោមនោះ មាន២៦៣នាក់ជាជនស៊ីវិលនិង១៥៤នាក់ ជាកងកម្លាំងសន្តិសុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ អ៊ីរ៉ង់មិនបានចេញតួលេខថ្មីទេ ក្រៅតែពីការបង្ហាញលើកចុងក្រោយបំផុតកាលពីថ្ងៃចន្ទ ដែលបញ្ជាក់ថា មនុស្ស២២៤នាក់ស្លាប់និង ១ ២៧៧នាក់របួស។

ចំណែកនៅខាងអ៊ីស្រាអែលវិញ តួលេខមនុស្សស្លាប់ដោយការវាយប្រហាររបស់អ៊ីរ៉ង់ នៅតែមានត្រឹម២៤នាក់ដដែល ដោយមិនទាន់មានអ្វីប្រែប្រួលនោះទេ។

សូមជម្រាបជាថ្មី អ៊ីស្រាអែល បានបើកប្រតិបត្តិការ «Risisng Lion» កាលពីថ្ងៃសុក្រទី១៣ខែមិថុនាឆ្នាំ២០២៥ ដោយបាញ់មីស៊ីលលើទីក្រុងតេហេរ៉ង់ ក្នុងគោលបំណងកម្ទេចកម្មវិធីនុយក្លេអ៊ែររបស់អ៊ីរ៉ង់។

អ៊ីស្រាអែលបញ្ជាក់ថា ខ្លួនគ្មាន​ជម្រើស​ផ្សេងក្រៅ​ពី​វាយ​អ៊ីរ៉ង់ឡើយ ព្រោះប្រទេសនេះ កំពុង​ស្ថិតនៅលើផ្លូវឈានឆ្ពោះទៅរកការផលិតបាន​គ្រាប់បែក​នុយក្លេអ៊ែរហើយ។ យ៉ាងណា អ៊ីរ៉ង់បានបដិសេធយ៉ាងដាច់អហង្ការចំពោះការចោទប្រកាន់នេះ និងអះអាងម្តងហើយម្តងទៀតថា កម្មវិធីនុយក្លេអ៊ែររបស់ខ្លួន គឺសម្រាប់តែគោលបំណងស៊ីវិលប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់ បាញ់មីស៊ីលដាក់មន្ទីរពេទ្យអ៊ីស្រាអែល ឯអ៊ីស្រាអែល វាយប្រហាររោងចក្រនុយក្លេអ៊ែរអ៊ីរ៉ង់ វិញ