ព័ត៌មានអន្ដរជាតិ

អតីតជំទាវទីមួយកូរ៉េខាងត្បូង Kim Keon Hee ត្រូវចាប់ខ្លួនដាក់ពន្ធនាគារពីបទពុករលួយ

បានផុស

៩ ខែ មុន

នៅ

ថ្ងៃពុធ ១៣ សីហា ២០២៥

ដោយ

Chheang

អតីតជំទាវទីមួយរបស់កូរ៉េខាងត្បូង Kim Keon Hee ត្រូវបានចាប់ខ្លួនដាក់ពន្ធនាគារកាលពីថ្ងៃទី១២ខែសីហាឆ្នាំ២០២៥ បន្ទាប់ពីតុលាការក្រុងសេអ៊ូលបានអនុម័តដីកាលើការចោទប្រកាន់ពីបទពុករលួយជាច្រើនករណី រួមទាំងការស៊ីសំណូក និងការក្លែងបន្លំភាគហ៊ុន។

លោកស្រី Kim Keon Hee បង្ហាញខ្លួននៅតុលាការក្រុងសេអ៊ូលថ្ងៃទី១២សីហា២០២៥ (រូបថត៖ Reuters)

លោកស្រី Kim បានក្លាយជាអតីតជំទាវទីមួយដំបូងគេរបស់កូរ៉េខាងត្បូង ដែលត្រូវបានឃុំខ្លួន ខណៈស្វាមីរបស់លោកស្រីដែលជាអតីតប្រធានាធិបតី Yoon Suk Yeol ក៏កំពុងត្រូវជាប់ពន្ធនាគារផងដែរ ដោយប្រឈមមុខនឹងការកាត់ទោសពីបទបះបោរ និងការរំលោភបំពានអំណាច។

តុលាការកណ្តាលក្រុងសេអ៊ូល បានចេញដីកាចាប់ខ្លួន បន្ទាប់ពីមានការអះអាងថា លោកស្រី Kim បានទទួលយកអំណោយដ៏ប្រណិតដោយខុសច្បាប់ ដូចជា បន្តោងខ្សែ ក Van Cleef តម្លៃជាង ៦០លានវ៉ុន និងកាបូបម៉ាក Chanel។ រដ្ឋអាជ្ញាចោទប្រកាន់ថា លោកស្រីបានទទួលរបស់ទាំងនេះជាថ្នូរនឹងការអនុគ្រោះផ្នែកនយោបាយ ជាមួយនឹងម្ចាស់ជំនួយ រួមទាំងឥស្សរជនអាជីវកម្ម និងក្រុមសាសនា។

ក្នុងអំឡុងពេលសវនាការ លោកស្រី Kim ដែលស្លៀកពាក់ឈុតខ្មៅ បានរក្សាភាពស្ងៀមស្ងាត់ ខណៈរង់ចាំការសម្រេចរបស់តុលាការ មុនពេលត្រូវបញ្ជូនខ្លួនទៅមន្ទីរឃុំឃាំង។ រដ្ឋអាជ្ញាបានបញ្ជាក់ថា ការចាប់ខ្លួនលោកស្រីគឺជាការចាំបាច់ ដោយសារតែមានការព្រួយបារម្ភថា លោកស្រីអាចនឹងរំខានដល់ព័ស្តុតាង។

លោកស្រី Kim បានបដិសេធរាល់ការចោទប្រកាន់ ដោយអះអាងថា បន្តោងខ្សែ ក នោះជារបស់ក្លែងក្លាយ ដែលបានទិញរាប់សិបឆ្នាំមុនមកម៉្លេះនៅទីក្រុងហុងកុង។ ទោះជាយ៉ាងណាក៏ដោយ ក្រុមអ្នកស៊ើបអង្កេតទទូចថា វាគឺជាអំណោយពីក្រុមហ៊ុនសំណង់មួយ ដែលឲ្យលោកស្រីពាក់នៅក្នុងកិច្ចប្រជុំកំពូលរបស់អង្គការណាតូឆ្នាំ២០២២។ ក្រុមមេធាវីរបស់លោកស្រីធ្លាប់បានច្រានចោលការចោទប្រកាន់នេះថាគ្មានមូលដ្ឋាន។

បើនិយាយពីស្វាមីលោកស្រីវិញ គឺលោក Yoon កំពុងប្រឈមមុខនឹងការចោទប្រកាន់យ៉ាងធ្ងន់ធ្ងរ ពាក់ព័ន្ធនឹងការប្រកាសច្បាប់អាជ្ញាសឹក ដែលអាចជាប់ពន្ធនាគារអស់មួយជីវិត ឬសូម្បីតែទោសប្រហារជីវិត៕