បាក់ទំនប់នៅវៀតណាម! មនុស្សរាប់ពាន់នាក់ ត្រូវជម្លៀសជាបន្ទាន់ ព្រោះតែគ្រោះថ្នាក់ខ្លាំង

ប្រទេសវៀតណាម បានជម្លៀសមនុស្សរាប់ពាន់នាក់ជាបន្ទាន់ នៅក្នុងសហគមន៍ That Khe, Trang Dinh, Khang Chien និង Quoc Viet នៃខេត្ត Lang Son បន្ទាប់ពីការបាក់ទំនប់វារីអគ្គិសនី បណ្តាលលឲ្យមានទឹកជំនន់ភ្លាមៗ បង្កគ្រោះថ្នាក់ខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីរសៀលថ្ងៃអង្គារទី៧ខែតុលាឆ្នាំ២០២៥ ទំនប់វារីអគ្គិសនី Bac Khe 1 បានបាក់ធ្វើឲ្យធ្លាយទឹកហូរបុកចេញយ៉ាងសន្ធាប់ ចាក់ចុះទៅតាមដងទន្លេ Bac Khe។

ដ្បិតមិនទាន់ដឹងថា​ មានមនុស្សស្លាប់ឬក៏អត់ ប៉ុន្តែអាជ្ញាធរបានធ្វើការជម្លៀសប្រជាជនចេញជាបន្ទាន់ក្នុងតំបន់នានា ស្ថិតនៅតាមវាលទំនាបនៃខ្សែទឹកខាងក្រោម។

តាមការផ្សាយរបស់ VN Express, មនុស្សរាប់ពាន់នាក់មកពី៨០០គ្រួសារ នៅក្នុងភូមិចំនួន១២ ត្រូវបានជម្លៀសទាំងយប់ ដោយសារតែស្ថានភាពមើលទៅមានគ្រោះថ្នាក់ខ្លាំង ព្រោះថា ទឹកកំពុងហក់ឡើងយ៉ាងលឿន។

ទន្ទឹមនោះ លទ្ធផលនៃការធ្លាយទំនប់នេះបូករួមជាមួយភ្លៀងធ្លាក់ខ្លាំងដោយសារឥទ្ធិពលព្យុះ ម៉ាតម៉ូ ធ្វើឲ្យទឹកទន្លេចំនួន៣នៅភាគខាងជើងប្រទេសវៀតណាម ហក់ឡើងហួសកម្រិតធ្ងន់ធ្ងរជាប្រវត្តិសាស្រ្តដល់ទៅ១ម៉ែត្រឯណោះ។

ទឹកទន្លេ Cau, Thuong និង Luc Nam សុទ្ធតែឡើងហួសកម្រិតប្រកាសអាសន្ន ជាពិសេសទន្លេ Cau ដែ​លហក់ឡើងខ្ពស់ផុតកម្រិតជាប្រវត្តិសាស្រ្ត ដែលកត់ត្រាកាលពីឆ្នាំ២០២៤ អំឡុងពេលព្យុះ យ៉ាកជី។

អាស្រ័យហេតុនេះហើយ ទើបអាជ្ញាធរវៀតណាម កំពុងប្រុងជើងការខ្ពស់ ត្រៀមទប់ទល់នឹងស្ថានភាពអាក្រក់ដែលនឹងចូលមកដល់ ព្រមទាំងព្រមានពលរដ្ឋឲ្យប្រុងប្រយ័ត្នខ្ពស់៕

អត្ថបទ៖ សុខ សុវណ្ណ

ចុចអាន៖ បាក់ទំនប់វារីអគ្គិសនីនៅវៀតណាម មិនទាន់ដឹងមានមនុស្សស្លាប់ឬអត់