៦ ខែចុងឆ្នាំ មន្រ្តី ក.ប.ប ខេត្តតាកែវ រឹបអូសទំនិញខូចគុណភាពបានជិត ៣ តោន

ខេត្តតាកែវ៖ ទំនិញខូចគុណភាព និងទំនិញក្លែងក្លាយ មានសារធាតុគីមីជិត ៣ តោន ត្រូវបានមន្រ្តីជំនាញការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) ខេត្តតាកែវ រកឃើញ និងរឹបអូសយកមកដុតបំផ្លាញចោល នៅ ព្រឹកថ្ងៃទី ២០ ខែធ្នូ ឆ្នាំ ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទំនិញខូចគុណភាព និងទំនិញក្លែងក្លាយ ទំនិញមានសារធាតុគីមី សរុបចំនួន ២ ៩៣៥ គីឡូក្រាម ត្រូវបានមន្រ្តីជំនាញសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) ខេត្តតាកែវ ធ្វើការដុតបំផ្លាញចោលនៅទីលានចាក់សំរាម ស្ថិតនៅ ភូមិស្នោរ សង្កាត់រកាក្នុង ក្រុងដូនកែវ។

លោក លី សេរីសម្បត្តិ ប្រធានសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) ខេត្តតាកែវ បានបញ្ជាក់ថា ទំនិញខូចគុណភាព និងទំនិញក្លែងក្លាយ ទំនិញដែលមានសារធាតុគីមីប្រមាណជិត ៣ តោន ក្នុងនោះមានអាកុលក្លែងក្លាយ គ្រឿងបរិភោគហួសកាលបរិច្ឆេទជាច្រើនមុខ ត្រូវបានមន្រ្តីជំនាញចុះពិនិត្យ និងដកហូតបាននៅ តាមបណ្តាទីផ្សារនានាទូទាំងខេត្តតាកែវ ក្នុងរយៈពេល៦ខែកន្លងទៅ នេះ។

ជាមួយគ្នានេះ លោកប្រធាន កបប បានសំណូមពរទៅ អាជីវករ ត្រូវពិនិត្យកាលបរិច្ឆេតរាល់មុខទំនិញរបស់ខ្លួនដែលកំពុងដាក់លក់ និងពេលទទួលលើកយកមកស្តុកទុកលក់ដូរ ជៀសវាងនាំឱ្យពួកគាត់ខាតបង់ ថវិកា ពេលវេលា ត្រូវកម្លាំងជំនាញចុះត្រួតពិនិត្យ និងរឹបអូស ពិសេសដើម្បីកុំឱ្យប៉ះពាល់សុខភាពអ្នកប្រើប្រាស់៕

អត្ថបទ៖ វីរៈ