សម្ដេចតេជោ ៖ ថ្នាក់មូលដ្ឋានកំពុងខ្វះកម្លាំង ស្របពេលដែលមានកិច្ចការជាច្រើន ត្រូវទទួលខុសត្រូវ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា នៅថ្នាក់មូលដ្ឋាន ឬថ្នាក់ក្រោមជាតិ កំពុងខ្វះខាតកម្លាំងមន្ត្រីដើម្បីបំពេញការងារ ស្របពេលដែលមន្ត្រីនៅថ្នាក់មូលដ្ឋាន កំពុងមានកិច្ចការជាច្រើន ដែលត្រូវទទួលខុសត្រូវ។

សម្ដេចតេជោនាយករដ្ឋមន្ត្រី ថ្លែងក្នុងពិធីប្រកាសផ្សព្វផ្សាយ និងដាក់ឲ្យអនុវត្តកម្មវិធីជាតិ សម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិដំណាក់កាលទី ២ ឆ្នាំ ២០២១ ដល់ ឆ្នាំ ២០៣០ នៅរសៀលថ្ងៃទី ២១ ខែមីនានេះថា «ក្នុងពេល ដែលថ្នាក់មូលដ្ឋានទទួលខុសត្រូវ យើងបានឃើញថា ថ្នាក់មូលដ្ឋានកំពុងខ្វះកម្លាំង ដូច្នេះហើយ បានជាយើងត្រូវរៀបចំវិសោធនកម្មច្បាប់ ដើម្បីកំណត់ចំនួនអ្នកទទួលខុសត្រូវ នៅក្នុងក្របខណ្ឌគណៈអភិបាល ខេត្ត និងស្រុក ផងដែរ»។

សម្ដេចតេជោនាយករដ្ឋមន្ត្រី បានលើកឡើងទៀតថា នេះគឺជាចំណុច ដែលចាំបាច់ត្រូវជំរុញនាពេលខាង​មុខ ពីព្រោះមិនអាចអ្វីៗនៅថ្នាក់ជាតិ ហើយថ្នាក់មូលដ្ឋាន ដែលនៅកៀកនឹងប្រជាពលរដ្ឋ មិនធ្វើសកម្មភាព ​​នោះទេ៕

អត្ថបទ៖ ឃួន សុភ័ក្រ