សម្ដេចតេជោ ហ៊ុន សែន ចេញសារលិខិតអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរ​

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញសារលិខិតអបអរសាទរ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ​ ឆ្នាំខាល ចត្វាស័ក ព.ស. ២៥៦៦។ នៅក្នុងសារលិខិតនោះ សម្ដេចតេជោនាយករដ្ឋមន្ត្រី សូមចូលរួមអបអរសាទរ ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ ដែលប្រព្រឹត្តទៅនាថ្ងៃព្រហស្បត្តិ៍ ១៣កើត ថ្ងៃសុក្រ ១៤កើត និងថ្ងៃសៅរ៍ ១៥កើត ខែចេត្រ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី ១៤ ទី ១៥ និងទី ១៦ ខែមេសា ឆ្នាំ ២០២២ ជាមួយបងប្អូនជនរួមជាតិទាំងអស់ ដែលកំពុងរស់នៅក្នុង និងក្រៅប្រទេស ប្រកបដោយក្ដីសោមនស្សរីករាយ សិរីសួស្ដី និងជ័យមង្គលដ៏ឧត្ដុងឧត្ដមក្នុងក្រុមគ្រួសារ និងសង្គមជាតិទាំងមូល។

បើតាមសម្ដេចតេជោ ហ៊ុន សែន ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំខាល ចត្វាស័ក ព.ស. ២៥​៦៦ ឆ្នាំនេះ ជាឆ្នាំទី ៤ នៃអាណត្តិរបស់រាជរដ្ឋាភិបាល នីតិកាលទី ៦ នៃរដ្ឋសភា ដែលបានខិតខំបន្តអនុវត្តកម្មវិធីនយោបាយ និងយុទ្ធសាស្រ្ដចតុកោណ ដំណាក់កាលទី ៤ ដែលបានដាក់ចេញកាលពីខែកញ្ញា ឆ្នាំ ២០១៨ សម្រេចបានសមិទ្ធផលធំៗថ្មីៗយ៉ាងច្រើន ប្រកបដោយមោទនភាព៕