នាយករដ្ឋមន្ត្រី សុំការយោគយល់ពីការកកស្ទះចរាចរណ៍ ដោយសារទទួលគណៈប្រតិភូចូលរួមកិច្ចប្រជុំរដ្ឋមន្រ្តីការបរទេសអាស៊ាន

សម្ដេចតេជោ​ ហ៊ុន សែន នាយករដ្ឋមន្ត្រីនៃកម្ពុជា បានស្នើសុំការអធ្យាស្រ័យ និងយោគយល់ពីប្រជាពលរដ្ឋ រស់នៅក្នុងរាជធានីភ្នំពេញចំពោះបញ្ហានៃការបិទផ្លូវ និងការកកស្ទះចរាចរណ៍ ដោយសារតែកម្ពុជាត្រូវទទួលគណៈប្រតិភូ អញ្ជើញចូលរួមកិច្ចប្រជុំរដ្ឋមន្រ្តីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធ។

សម្ដេចតេជោ ហ៊ុន សែន បានថ្លែងក្នុងពេលអញ្ជើញទទួលសញ្ញាបត្របណ្ឌិតកិត្តិយសផ្នែកអភិវឌ្ឍន៍ ពីសាកលវិទ្យា ល័យភូមិន្ទភ្នំពេញ នៅព្រឹកថ្ងៃទី ៥ ខែសីហានេះថា «នៅក្នុងឱកាសនេះ ខ្ញុំក៏សុំការយោគយល់អធ្យាស្រ័យពីសំណាក់ប្រជាជន នៅរាជធានីភ្នំពេញរបស់យើង ដោយសារតែបិទផ្លូវ ព្រោះគណៈប្រតិភូត្រូវធ្វើដំណើរ គណៈប្រតិភូមិនចេះតិចឯងណា ជាង ២០គណៈប្រតិភូ ដែលមក គណៈប្រតិភូ ដែលចូលរួមប្រជុំ និងគណៈប្រតិភូ ដែលមកចុះហត្ថលេខាលើសសន្ធិសញ្ញាមិត្តភាព និងសហប្រតិបត្តិការនៅអាស៊ីអាគ្នេយ៍»។

សម្ដេចតេជោនាយករដ្ឋមន្ត្រី បានថ្លែងបន្តថា ដោយសារតែកម្ពុជា ត្រូវធ្វើជាម្ចាស់ផ្ទះរៀបចំកិច្ចប្រជុំរដ្ឋមន្រ្តីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធ នឹងការកកស្ទះចរាចរណ៍នៅរាជធានីភ្នំពេញ  ដោយសារតែការបិទផ្លូវ ដើម្បីធានាការធ្វើដំណើររប​ស់គណៈប្រតិភូ។ សម្ដេចតេជោ ហ៊ុន សែន បានលើកឡើងថា «ដែលខ្ញុំយល់ថា នេះវាជាការរំខានមួយ ប៉ុន្តែវាក៏ជាកិត្តិយសរបស់កម្ពុជាខ្លួនឯងទេ»៕

អត្ថបទ៖ ឃួន សុភ័ក្រ