ទណ្ឌិត ២៧ នាក់ នៅបន្ទាយមានជ័យ​ទទួលបាន​ការបន្ធូរបន្ថយទោស

មន្ត្រីពន្ធនាគារបានលើក​ឡើងក្នុងកិច្ចប្រជុំនៅថ្ងៃទី ១៩ ខែសីហាថា ព្រះមហាក្សត្រ​បានព្រះរាជទានធ្វើការបន្ធូបន្ថយទោសពី ៣ ខែ ដល់ ៦ ខែ និង ៩ ខែ ដល់ទណ្ឌិតចំនួន ២៧នាក់ក្នុងនោះមានស្រី១នាក់ក្នុងឪកាស​ពិធីបុណ្យ​ជាតិធំៗ​ក្នុងឆ្នាំ ២០២២ នេះ។ ​

​ក្នងកិច្ចប្រជុំដោយមានការចូលរួមរបស់លោក គឹង វណ្ណ​ អភិបាលរងខេត្តបន្ទាយមានជ័យលោក​លឹម ប៊ុនសុភ័ក្រ្ត ព្រះរាជអាជ្ញារងខេត្តបន្ទាយមានជ័យ និងមន្ត្រីពន្ធនាគារជាច្រើននាក់។

មន្ត្រីពន្ធនាគារបានបញ្ជាក់ឲ្យដឹងបន្តទៀតថា មានការរបន្ធូបន្ថយទោសពី៣ ខែ មានចំនួន ១៧នាក់ ដល់៦ខែមានចំនួន៦នាក់ និង៩ខែមានចំនួន៤នាក់ ដល់ទណ្ឌិតចំនួន ២៧នាក់ ក្នុងនោះមាន​ស្រី១នាក់។

មន្ត្រីពន្ធនាគារបានបញ្ជាក់ឲ្យដឹងបន្តទៀតថា ពន្ធនាគារខេត្តបន្ទាយមានជ័យស្ថិតក្នុងភូមិទំនុបជ្រៃ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ហើយការលើកលែងទោសដល់ទណ្ឌិតចំនួន២៧នាក់នេះក្នុងពិធីបុណ្យជាតិធំៗ បន្ធូបន្ថយទោសដល់ទណ្ឌិត​នេះដោយព្រះមហាក្សត្រ។

មន្ត្រីពន្ធនាគារបានបញ្ជាក់ឲ្យដឹងបន្តទៀតថាពន្ធនាគារខេត្តបន្ទាយមានជ័យបានអនុវត្តនៅតួនាទីភារកិច្ចរបស់ខ្លួនដូចជាការអប់រំកែប្រែស្ដានិតិសម្បទាការបណ្ដុះបណ្ដាលវិជ្ជាជីវៈ ការរក្សាសន្តិសុខ​សណ្ដាប់ធ្នាប់នៅក្នុងពន្ធនាគារ ការងារកសិកម្មសិប្បកម្ម ការអភិវឌ្ឍន៍ធនធានមនុស្ស និងការអភិវឌ្ឍន៍ហេដ្ឋារចនាសម្ព័ន្ធនានា ប្រកបដោយភាពទទួលខុសត្រូវខ្ពស់៕
អត្ថបទ៖ វ៉ាន់ ណាង