សម្ដេចតេជោ ៖ មានមូលហេតុ ២សំខាន់ ដែលរាជរដ្ឋាភិបាលសម្រេចមិនរៀបចំ ព្រះរាជពិធីបុណ្យអុំទូកថ្នាក់ជាតិ នាឆ្នាំនេះ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់មូលហេតុចំនួនពីរចំណុច ដែលរាជរដ្ឋាភិបាលសម្រេចមិនរៀបចំ ព្រះរាជពិធីបុណ្យអុំទូកថ្នាក់ជាតិ នៅរាជធានីភ្នំពេញ នាឆ្នាំ ២០២២នេះ។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារជាសំឡេងពិសេសផ្ញើជូនជនរួមជាតិ នាព្រឹកថ្ងៃទី ១៥ ខែកញ្ញានេះ សម្ដេចតេជោ ហ៊ុន សែន បានថ្លែងថា នៅក្នុងកិច្ចប្រជុំពេញអង្គគណៈរដ្ឋមន្ត្រី កាលពីសប្ដាហ៍មុន សម្ដេចបានសម្រេចមិនរៀបចំព្រះរាជពិធីបុណ្យអុំទូកថ្នាក់ជាតិ នៅរាជធានីភ្នំពេញនោះទេ។ ប៉ុន្តែសម្រាប់នៅតាមបណ្ដាខេត្តនានា អាចរៀបចំពិធីបុណ្យអុំទូកបានជាធម្មតា ហើយមកដល់ពេលនេះ មានខេត្តមួយចំនួនបានត្រៀមរៀបចំរួចទៅហើយ។

ចំពោះការសម្រេចមិនរៀបចំ ពិធីបុណ្យព្រះរាជពិធីអុំទូកថ្នាក់ជាតិនេះ មានមជ្ឈដ្ឋានខ្លះបានចេញមកវិភាគថា មូលហេតុដោយសារតែរាជរដ្ឋាភិបាលអស់ថវិកា។ សម្ដេចតេជោ ហ៊ុន សែន បានថ្លែងទទួលស្គាល់ថា ប្រទេសកម្ពុជាក្រីក្រ តែកម្ពុជាមិនទាន់ដល់ដំណាក់កាល ដែលរដ្ឋក្ស័យធននោះទេ ដោយនៅតែមានលទ្ធភាពដើម្បីចំណាយ ទៅលើការរៀបចំព្រះរាជពិធីបុណ្យអុំទូក ប្រសិនបើត្រូវរៀបចំ។

សម្ដេចតេជោនាយករដ្ឋមន្ត្រី បានគូសបញ្ជាក់ថា មានមូលហេតុ ២សំខាន់ ដែលរាជរដ្ឋាភិបាលសម្រេចមិនរៀបចំពិធីបុណ្យអុំទូកថ្នាក់ជាតិនៅឆ្នាំនេះ គឺទីមួយបញ្ហាជំងឺកូវីដ-១៩ ដែលមកដល់ពេលនេះមិនទាន់ចប់នៅឡើយ ហើយមិនចង់ឲ្យមានការប្រមូលផ្ដុំមនុស្សច្រើន នៅរាជធានីភ្នំពេញនោះឡើយ។ ទីពីរ ដោយសារតែរាជរដ្ឋាភិបាល ត្រូវរៀបចំកិច្ចប្រជុំកំពូលអាស៊ាន ដោយកម្ពុជាធ្វើជាម្ចាស់នាឆ្នាំ ២០​២២នេះ ហើយនេះជាហេតុផលដ៏សំខាន់ ដែលត្រូវសម្រេចមិនរៀបចំព្រះរាជពិធីបុណ្យទូកថ្នាក់ជាតិ នាឆ្នាំនេះ៕

អត្ថបទ៖ ឃួន សុភ័ក្រ