UNICEF៖ វិបត្តិផ្លូវចិត្ត នៅតែជាបញ្ហាធំមួយដែលគួរយកចិត្តទុកដាក់

នៅទូទាំងសកលលោក អត្តឃាត ជាមូលហេតុនាំមុខគេទីបួននៃការស្លាប់ក្នុងចំណោមមនុស្សវ័យក្មេងដែលមានអាយុពី ១៥-១៩ ឆ្នាំ។ យោងតាមយូនីសេហ្វ ក្មេងជំទង់ម្នាក់ក្នុងចំណោម ៧នាក់ ដែលមានអាយុពី ១០ ទៅ ១៩ឆ្នាំ ទទួលរងវិបត្តិផ្លូវចិត្ត។ ហេតុនេះ វិបត្តិផ្លូវចិត្ត នៅតែជាបញ្ហាធំមួយដែលគួរយកចិត្តទុកដាក់ ពិសេសស សុខភាពផ្លូវចិត្តរបស់កុមារ ក្មេងជំទង់ និងយុវជននៅកម្ពុជា។

អង្គការយូនីសេហ្វ និងUNFPA បានធ្វើការយ៉ាងជិតស្និទ្ធជាមួយក្រសួងសុខាភិបាលកម្ពុជា ដែលប្តេជ្ញាយ៉ាងពេញ​លេញ ដើម្បីផ្តល់ការថែទាំសុខភាពផ្លូវចិត្តឱ្យបានគ្រប់គ្រាន់ដល់កុមារ ក្មេងជំទង់ និងយុវជននៅក្នុងប្រទេស។ យ៉ាង​ណាមិញ វិបត្តិផ្លូវចិត្ត ឬការថប់បារម្ភ មិនគួរជាបញ្ហាសុខភាពសាធារណៈតែមួយនោះទេ ប៉ុន្តែ គួរតែត្រូវបានគេទទួលស្គាល់ថា ជាក្តីបារម្ភរបស់សង្គមមួយ ព្រោះ​វិបត្តិ​នេះបានបង្កផលប៉ះពាល់​យ៉ាងធំធេងបំផុតមកលើ​កុមារ ក្មេង​ជំទង់ និង​យុវជន ដែលគេ​មិន​ធ្លាប់បានជួបប្រទះនាពេលកន្លង​មក។

បើតាមយូនីសេហ្វ នៅក្នុងឆ្នាំ២០២២ មនុស្សយ៉ាងតិច ៨៧៣នាក់ បានស្លាប់ដោយសារការធ្វើអត្តឃាត ដែលភាគច្រើនមានអាយុចន្លោះពី ១៥ ទៅ ១៩ឆ្នាំ ។ ប្រជាជន​កម្ពុជា​ប្រមាណ​កន្លះ​លាន​នាក់ ​ទទួល​រង​ផល​ប៉ះពាល់​ដោយ​វិបត្តិ​បាក់​ទឹកចិត្ត ឬ​ការ​ថប់​បារម្ភ ដែល​ជា​កត្តា​រួម​ចំណែក​ដ៏ធំចំពោះ​ការ​ធ្វើ​អត្តឃាត។ អ្វីដែលគួរឱ្យភ្ញាក់ផ្អើលគឺប្រមាណ ៥៨ភាគរយនៃសិស្សនៅថ្នាក់មធ្យមសិក្សា បានរាយការណ៍ឱ្យដឹងថា បានទទួលរងបញ្ហាសុខភាពផ្លូវចិត្តយ៉ាងហោចណាស់ចំនួនមួយករណី បន្ទាប់ពីមានការបិទសាលាយ៉ាងយូរដោយសារតែជំងឺកូវីដ-១៩។

ជំងឺរាតត្បាតជាសកលនេះ បានធ្វើឱ្យគ្រួសារជិតកន្លះលានធ្លាក់ខ្លួនក្នុងភាពក្រីក្រ ដោយធ្វើឱ្យពួកគេកាន់តែងាយរងគ្រោះ ហើយករណីរំលោភបំពាន និងអំពើហិង្សាពាក់ព័ន្ធនឹងយេនឌ័រកើនឡើងកាន់តែច្រើន។ អ្វីដែលគួរឱ្យភ្ញាក់ផ្អើល គឺកុមារ និងក្មេងជំទង់ប្រមាណ ៤០ភាគរយ បានទទួលរងអំពើហិង្សា និងការបំពានផ្លូវកាយ និងផ្លូវចិត្ត រួមទាំងការរំលោភបំពានផ្លូវភេទ និងការគំរាមកំហែងផងដែរ ។

គួរជម្រាបដែរថា កុមារជាច្រើនក្នុងពិភពលោក និងក្មេងជំនាន់ក្រោយនៅក្នុងប្រទេសកម្ពុជាសព្វថ្ងៃក៏ប្រឈមមុខនឹងអនាគតមិនច្បាស់លាស់ ដោយសារតែវិបត្តិអាកាសធាតុដែលមនុស្សជំនាន់មុនបន្សល់ទុកឱ្យពួកគេ ដែលអាចធ្វើឱ្យពួកគេគ្មានទីពឹង ឬងាយរងគ្រោះ៕