ព័ត៌មានជាតិ

មន្រ្តីអភិរក្សរកឃើញទីតាំងសំបុកសត្វត្មាត ៣០ នៅកម្ពុជា ជាកំណត់ត្រាខ្ពស់បំផុត

បានផុស

២ years មុន

នៅ

ថ្ងៃព្រហស្បតិ៍ ៥ កញ្ញា ២០២៤

ដោយ

ក្នុងឆ្នាំ២០២៣ សមាជិកក្រុមការងារអភិរក្សសត្វត្មាតកម្ពុជា (CVWG) បានរកឃើញទីតាំងសំបុកសត្វត្មាតចំនួន ៣០ សំបុកក្នុងប្រទេសកម្ពុជា ដែលនេះត្រូវបានចាត់ទុកជាកំណត់ត្រាបង្កកំណើតជោគជ័យខ្ពស់បំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ប្រចាំឆ្នាំ ២០២៣ របស់ក្រុមការងារអភិរក្សសត្វត្មាតនៅកម្ពុជា (CVWG) បានបង្ហាញពីវឌ្ឈនភាពលើការអភិរក្សសត្វត្មាតទាំងបីប្រភេទ ដែលជាប្រភេទស្ថិតក្នុងចំណាត់ថ្នាក់ងាយរងគ្រោះជិតផុតពូជបំផុតរួមមាន ត្មាតផេះ (Gyps bengalensis) ត្មាតត្នោត (Gyps tenuirostris) និងត្មាតភ្លើង (Sarcogyps calvus)។

របាយការណ៍បញ្ជាក់ថា ទីតាំងសំបុកសត្វត្មាតចំនួន ៣០ សំបុក ដែលរកឃើញនៅក្នុងប្រទេសកម្ពុជា និងនៅទីតាំងព្រំដែនប្រទេសឡាវ ទទួលបានអត្រាសំបុកជោគជ័យខ្ពស់រហូតដល់ ៨៧% ដោយមានកូនញាស់ចំនួន ២៦ ក្បាល ដែលនេះជាកំណត់ត្រាខ្ពស់បំផុត។

របាយការណ៍ក៏បានរំលេចពីកិច្ចខំប្រឹងប្រែងសហការ របស់ក្រុមការងារអភិរក្សសត្វត្មាតនៅកម្ពុជាចាប់ពីខែមករារហូតដល់ខែធ្នូ ឆ្នាំ២០២៣ ដោយបានបង្ហាញអំពីបញ្ហាប្រឈមដែលកើតមានឡើង និងភាពជោគជ័យដែលសម្រេចបាននៅក្នុងកិច្ចការពារប្រភេទសត្វសំខាន់ៗទាំងនេះ។

លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថានមានប្រសាសន៍ថា បន្ទាប់ពីចំនួនប្រជាសាស្រ្តរបស់សត្វត្មាតមានការធ្លាក់ចុះជាច្រើនឆ្នាំ ឥឡូវនេះយើងឃើញមានសញ្ញាណចំនួនថេរនៅប្រទេសកម្ពុជា។

ការរកឃើញសត្វត្មាតមានចំនួនថេរនេះ បានបង្ហាញពីសារៈសំខាន់នៃតំបន់ការពារធម្មជាតិរបស់កម្ពុជា ដែលកំពុងផ្តល់ជម្រកប្រកបដោយសុខសុវត្ថិភាព សម្រាប់សត្វព្រៃនិងជីវៈចម្រុះ និងអនុញ្ញាតឱ្យជីវៈចម្រុះអាចរីកលូតលាស់តាមធម្មជាតិដោយគ្មានការគម្រាមកំហែង និងធ្វើឱ្យប្រព័ន្ធអេកូឡូស៊ីកាន់តែមាននិរន្តរភាព ជួយគាំទ្រដល់ការរស់នៅរបស់សត្វត្មាតជិតផុតពូជរបស់យើង។

គំនិតផ្តួចផ្តើមបង្កើតអាហារដ្ឋានត្មាត សម្រាប់ផ្តល់សាកសពសត្វចិញ្ចឹមជាចំណីដល់សត្វត្មាតនៅតាមទីជម្រកសំខាន់ៗ បានជួយផ្តល់នូវអាហារបន្ថែមដល់សត្វត្មាត ដើម្បីកាត់បន្ថយការខ្វះខាតចំណីអាហារ។

ក្រុមការងារអភិរក្សសត្វត្មាតនៅកម្ពុជាបានបញ្ចាក់ថា “យើងពិតជារំភើបជាមួយលទ្ធផលនៃការពងកូនជោគជ័យនៅក្នុងឆ្នាំនេះ។ កូនត្មាតទាំងនោះតំណាងឱ្យក្តីសង្ឃឹមនាពេលអនាគតរបស់ក្រុមការងារអភិរក្សសត្វត្មាតនៅកម្ពុជា។ មិនតែប៉ុណ្ណោះវាជាសក្ខីភាពមួយដែលបង្ហាញពីប្រសិទ្ធភាពនៃយុទ្ធសាស្រ្តអភិរក្សរបស់យើង និងការលះបង់របស់ក្រុមការងារនៅទីវាល“។

ជាមួយគ្នានោះ ក្រុមការងារអភិរក្សសត្វត្មាតកម្ពុជាក៏បានលើកឡើងពីការដោះស្រាយកត្តាគម្រាមកំហែងនៃការបំពុលដែលជាមូលហេតុចម្បងបង្កឲ្យសត្វត្មាតស្លាប់។ នៅឆ្នាំ២០២៣ មានករណីបំពុលចំនួន៨ ត្រូវបានរកឃើញ និងបានចាត់វិធានការយ៉ាងរហ័សដើម្បីលុបបំបាត់ការសាយភាពសារធាតុបំពុល។ ជាក់ស្តែងក្នុងឆ្នាំ២០២៣ នេះ មិនមានសត្វត្មាតត្រូវបានស្លាប់ដោយការបំពុលនោះទេ។

ដើម្បីលើកកម្ពស់ការយល់ដឹង និងកៀរគរសាធារណៈជនឲ្យចូលរួមអភិរក្សសត្វត្មាត ក្រុមការងារអភិរក្សសត្វត្មាតនៅកម្ពុជា ធ្វើការសម្របសម្រួលរៀបចំអបអរសាទរទិវាយល់ដឹងពីសត្វត្មាតអន្តរជាតិ នៅក្នុងប្រព័ន្ធផ្សព្វផ្សាយ និងរៀបចំសិក្ខាសាលាចែករំលែកចំណេះដឹងទៅកាន់និស្សិតផ្នែកបរិស្ថាន។

កិច្ចខិតខំប្រឹងប្រែងទាំងនេះត្រូវបានគេរំពឹងថានឹងពង្រឹងការគាំទ្រសម្រាប់កិច្ចការពារសត្វត្មាត ពង្រីកបណ្តាញអ្នកគាំទ្រ អ្នកស្ម័គ្រចិត្ត និងម្ចាស់ជំនួយ។ លើសពីនេះទៀត សកម្មភាពទាំងនេះបានបង្កើតការផ្សាយជាវិជ្ជមាន និងបង្ហាញពីការប្តេជ្ញាចិត្តរបស់ក្រុមការងារអភិរក្សសត្វត្មាតនៅកម្ពុជា ក្នុងការអភិរក្សប្រភេទសត្វសំខាន់ៗទាំងនេះ៕