ពលរដ្ឋ១៤០០គ្រួសារនៅឃុំត្នោតជុំ ស្រុកបារាយណ៍ ទទួលបានចង្ក្រានសន្សំសំចៃថាមពលពីរដ្ឋមន្ត្រីទេសចរណ៍  

ប្រជាពលរដ្ឋចំនួន១៤០០គ្រួសារនៅឃុំត្នោតជុំ ស្រុកបារាយណ៍ ទទួលបានចង្រ្កានសន្សំសំចៃថាមពលដែលជាអំណោយរបស់លោក ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកបារាយណ៍។

កម្មវិធីប្រគល់-ទទួលចង្រ្កានសន្សំសំចៃថាមពលនេះ ត្រូវបានរៀបចំឡើងកាលពីថ្ងៃសៅរ៍ ទី៣០ ខែវិច្ឆិកា ឆ្នាំ២០២៤ ក្រោមអធិបតីភាពលោក ហួត ហាក់ និងលោកស្រី។

ក្នុងពិធីនេះ មានការអញ្ជើញចូលរួមពីប្រធានគណៈកម្មាធិការគណបក្សស្រុកបារាយណ៍ អភិបាលស្រុកបារាយណ៍ ក្រុមការងារគណបក្សចុះមូលដ្ឋានស្រុកបារាយណ៍ និងជាប្រធានក្រុមការងារគណបក្សចុះមូលដ្ឋានឃុំត្នោតជុំ ព្រមទាំងប្រជាពលរដ្ឋសរុបចំនួនប្រមាណ ២០០០នាក់ នៅបរិវេណសហគមន៍ទេសចរណ៍ត្នោតជុំ ស្រុកបារាយណ៍ ខេត្តកំពង់ធំ។

លោក ហួត ហាក់ បានថ្លែងនូវអំណរគុណដល់ក្រុមហ៊ុនចិន Guang Zhou Iceberg Environmental Consulting Services ដែលបានឧបត្ថម្ភជាចង្ក្រានចំនួន ១៤០០ ជូនប្រជាពលរដ្ឋនៅឃុំត្នោតជុំនេះ ដែលជាចង្ក្រានសន្សំសំចៃថាមពលផលិតដោយបច្ចេកវិទ្យាថ្មី ចំណេញជាងមុន៤ដង បើប្រៀបធៀបជាមួយចង្ក្រានធម្មតាដែលពលរដ្ឋកំពុងប្រើប្រាស់៕