ប្រធានសភា៖ កន្លងមកនេះមិនទាន់បានកំណត់ថវិកាសម្រាប់ដោះស្រាយជំងឺមិនឆ្លងនោះឡើយ

ប្រធានរដ្ឋសភា សម្ដេចសភាធិការធិបតី ឃួន សុដារី ប្រាប់ទៅក្រសួងសុខាភិបាលឱ្យគិតគូរពិចារណាស្វែងរក និងលៃលក​ថវិកាសម្រាប់គ្រប់គ្រង និងដោះស្រាយបញ្ហាប្រឈមនៃជំងឺមិនឆ្លង។ សម្ដេចបានលើកឡើងបែបនេះក្នុងពិធីបើកសិក្ខាសាលាសភាថ្នាក់តំបន់ស្តីពី «បម្រែបម្រួលប្រជាសាស្ត្រ និងជំងឺមិនឆ្លង» នៅសាលសន្និសីទ្ធរដ្ឋសភាព្រឹកថ្ងៃទី៣១ ខែមីនា។

ការលើកឡើងរបស់សម្ដេចសភាធិការធិបតី គឺបន្ទាប់ពីសម្ដេចបានដឹងថា ក្នុងថវិកាឆ្នាំ២០២៥ និងកន្លងមកនេះក្រសួងមិនទាន់បានកំណត់ថវិកាសម្រាប់ដោះស្រាយបញ្ហាជំងឺមិនឆ្លងនោះឡើយ ហើយស្របនឹងអត្រាស្លាប់របស់ពលរដ្ឋដោយសារជំងឺមិនឆ្លងនេះកំពុងកើនឡើងថែមទៀត។

សម្ដេចថា៖ «នេះជាតួលេខមួយដ៏គួរឱ្យព្រួយបារម្ភជាខ្លាំង ដោយយើងទាំងអស់គ្នា ទាំងស្ថាប័នប្រតិបត្តិ នីតិប្បញ្ញត្តិ និងវិស័យឯកជន ត្រូវធ្វើការរួមគ្នាឱ្យកាន់តែជិតស្និត និងសកម្មថែមទៀត ដើម្បីកាត់បន្ថយហានិភ័យនៃជំងឺនេះឱ្យនៅកម្រិតអប្បបរមា»។

របាយការណ៍ក្រសួងសុខាភិបាលបង្ហាញថា អត្រាស្លាប់ដោយជំងឺមិនឆ្លងនៅកម្ពុជាមានប្រមាណ៦៤%ហើយ ២៣%អាចស្លាប់មុនអាយុ៧០ឆ្នាំ។ ក្នុងន័យនេះប្រជាជនកម្ពុជាម្នាក់ក្នុងចំណោមបួននាក់អាចស្លាប់មុនអាយុ៧០ឆ្នាំ ដោយសារជំងឺឆ្លង។

សម្ដេចប្រធានរដ្ឋសភាថារដ្ឋសភាគាំទ្រដល់ការដឹកនាំរបស់នាយករដ្ឋមន្ត្រី សម្ដេចធិបតី ហ៊ុន ម៉ាណែត ដែលបានទទួលស្គាល់នូវបញ្ហាជំងឺមិនឆ្លងនិងសម្រេចដាក់បញ្ជូលជំងឺនេះទៅក្នុងគោលដៅអភិវឌ្ឍន៍ដោយចីរភាព ដើម្បីសម្រេចបានការថយចុះ ១/៣ នៃអាត្រាមរណមុនអាយុដោយសារជំងឺមិនឆ្លងត្រឹមឆ្នាំ២០៣០។

លើសពីនេះតាំងនាមឱ្យសភាកម្ពុជា សម្ដេចសភាធិការធិបតី បានបញ្ជាក់ថានឹងគាំទ្រជានិច្ចដល់គោលនយោបាយ និងច្បាប់ទាំងឡាយណាដែលដាក់ឆ្លងរដ្ឋសភាដែលមានគោលដៅ ការពារ និងលើកម្ពស់សុខមាលភាពប្រជាពលរដ្ឋ។

កាលពីកន្លងទៅសភាជាតិកម្ពុជាបានអនុម័តច្បាប់ស្ដីពីការការពារអ្នកប្រើប្រាស់ និងការប្រកួតប្រជែងមិនស្មោះត្រង់ និងច្បាប់ស្ដីពីសុវត្ថិភាពចំណីអាហារជាដើម ដែលជាការបោះជំហានថ្មីមួយទៀតក្នុងការកាត់បន្ថយហានិភ័យនៃការកើតជំងឺមិនឆ្លង ដោយប្រើប្រាស់វិធានការលើសពីវិស័យសុខាភិបាល៕

អត្ថបទដោយ ហ៊ុន សិរីវឌ្ឍន៍