យុវជនគួរចូលរួមលេងល្បែងប្រជាប្រិយខ្មែរ ដើម្បីលើកកម្ពស់សង្ក្រាន្តខ្មែរ!

ពេលឱកាសចូលឆ្នាំថ្មីប្រពៃណីជាតិ ឬសង្ក្រាន្តខ្មែរជិតឈានចូលមកដល់ម្ដងៗ ការលេងល្បែង​ប្រជាប្រិយ​តែងតែបានក្លាយជា​ប្រធានបទឈានមុខគេនៅលើប្រព័ន្ធផ្សព្វផ្សាយ រួមមាន វិទ្យុ ទូរទស្សន៍ ការសែតអនឡាញ និងបណ្ដាញសង្គមនានា។ ក្នុងការ​ជជែកវែក​ញែកលើប្រធានបទនេះ មានការបញ្ចេញមតិខុសៗគ្នា ទោះបីជាយ៉ាងណាក៏ដោយ ក៏ជា​រួម​មតិយោបល់ទាំងនោះ សុទ្ធតែបានបង្ហាញអំពីការព្រួយបារម្មណ៍ខ្លាចបាត់បង់​ល្បែង​ប្រជាប្រិយ​ខ្មែរ​ដែលជាផ្នែកដ៏សំខាន់មួយនៃពិធីបុណ្យចូលឆ្នាំថ្មីប្រពៃណីជាតិ ឬសង្ក្រាន្តខ្មែរ ពីព្រោះ​តែជាទូទៅ គេសង្កេតឃើញថា ​យុវជនខ្មែរភាគច្រើន​មិនសូវនិយមលេង​ល្បែង​ប្រជាប្រិយទេនៅក្នុងពិធីបុណ្យចូលឆ្នាំ​ថ្មី ឬសង្ក្រាន្តខ្មែរ​។

តើត្រូវធ្វើដូចម្ដេច ដើម្បីលើកទឹកចិត្ត ឬជំរុញយុវជនខ្មែរឱ្យ​ងាកមកចូលរួម​លេង​ល្បែង​ប្រជាប្រិយ​ខ្មែរវិញ?

ល្បែងប្រជាប្រិយខ្មែរដែលប្រជាជនខ្មែរនិយមលេងនៅក្នុងឱកាសពិធីបុណ្យចូលឆ្នាំ​ថ្មីឬ សង្ក្រាន្ត ​និងក្នុងពិធីបុណ្យផ្សេងៗ  រួមមាន ​ស្ដេចចង់ ចោលឈូង ចាប់កូនខ្លែង លោតអន្ទាក់ លាក់កន្សែង ឱបត្រឡាច គ្របមាន់ បិទពួន បោះអង្គញ់ គោះត្រឡោក ទាត់សី ទាញព្រ័ត្រ រាវបង្កង ចត្រង្គ ឬអុក បាយខុំ ស្វាដណ្ដើមស្លឹកឈើ លោតបាវ រាំទូលក្អម វាយក្អម ខាំប៉ិកគក់ បូមទឹកដាក់ដប។ល។ ល្បែងប្រជាប្រិយទាំងនេះ មានកំណើតតាំងពីយូរយារណាស់មកហើយ។ ក្នុង​សម័យដើម ល្បែងប្រជាប្រិយនេះ មានភាពពេញនិយមណាស់​ មិនមែនតែយុវជនទេ​ដែល​ចូលចិត្តលេង​ល្បែងនេះ សូម្បីតែមនុស្សចាស់ក៏ចូលរួមលេងល្បែងនេះជាមួយយុវជនដែរ។ លើស​ពីនេះទៀត ពួកគេថែមទាំងបានដើរតួនាទីយ៉ាងសំខាន់ក្នុងការលើកទឹកចិត្ត ការផ្ដួចផ្ដើម​គំនិត និងការរៀបចំឱ្យមានការលេងល្បែងប្រជាប្រិយទាំងអស់នេះទៀតផង។

ក្នុងអតីកាល ការប្រារព្ធពិធីបុណ្យចូលឆ្នាំ​ថ្មីប្រពៃណីជាតិ ឬសង្ក្រាន្ត​ភាគច្រើនលើសលប់គេ​ធ្វើឡើង​​នៅក្នុងទីអារាម ដែលជា​កន្លែងដ៏សមរម្យ និងពេញនិយមបំផុតសម្រាប់ការរៀបចំ​ពិធីបុណ្យផ្សេងៗ ​រួមទាំងពិធីសង្ក្រាន្ត។ ក្រៅពីនេះ ពិធីបុណ្យចូលឆ្នាំ​ថ្មីប្រពៃណីជាតិ ឬសង្ក្រាន្ត​ក៏មានធ្វើនៅទីសាធារណៈដែរ។ បច្ចុប្បន្ន ទីអារាមមួយចំនួន ជាពិសេស អារាមនៅរាជធានី ទីក្រុង ឬទីប្រជុំជនមួយចំនួន លែង​មានភាព​សមស្រប​សម្រាប់ការ​រៀបចំពិធីសង្ក្រាន្តទៀត​ហើយ ដោយសារអារាមទាំងនោះសម្បូរទៅ​ដោយសំណង់ផ្សេងៗច្រើនពេក ដូចជា កុដិ ចេតិយ ម៉ុង ជាដើម។

សម័យបច្ចុប្បន្ននេះ សាលារៀនទាំងរដ្ឋ ទាំងឯកជន និងស្ថាប័នរដ្ឋមួយចំនួនក៏បាន​ ប្រារព្ធពិធី​អបអរសាទរ​ដើម្បី​លើកម្ពស់​ប្រពៃណីទំនៀមទម្លាប់ខ្មែរ និងបាន​រៀបចំឱ្យមាន​ការ​លេង​ល្បែង​ប្រជាប្រិយខ្មែរដែរនៅមុនពេល​ដែលពិធីសង្ក្រាន្ត​ផ្លូវការចូលរមកដល់។ ប៉ុន្តែ ការរៀបចំលេងល្បែង​ប្រជាប្រិយទាំងនោះ ហាក់ដូចជា​នៅមានកម្រិត មិនសូវមានភាពផុលផុស និងអធិកអធមនៅឡើយ ហើយយុវជនមួយ​ចំនួ​ន ក៏មិនសូវបាន​ចូលរួមលេង​យ៉ាងសកម្មនូវល្បែង​ប្រជាប្រិយទាំងនោះដែរ។ ពួកគេ​ហាក់ដូចជាងារកទៅចូលចិត្តលេងបាញ់ទឹក ប៉ាតម្សៅ ទៅវិញ។ ក្នុងស្ថានភាពបែបនេះ បានធ្វើឱ្យ​អ្នក​ស្រឡាញ់​វប្បធម៌​ ប្រពៃណី​ជាតិ​ បង្ហាញការព្រួយបារម្មណ៍អំពីការបាត់បង់ការ​លេង​ល្បែង​ប្រជាប្រិយខ្មែរក្នុង​ចំណោម​យុវជន។

តើយើងត្រូវធ្វើដូចម្ដេច ដើម្បីដោះស្រាយបញ្ហានេះ? នេះ គឺជាសំណួរដ៏សំខាន់មួយ។ ក្នុងប៉ុន្មានឆ្នាំ​ចុងក្រោយនេះ រួមទាំងក្នុងឆ្នាំ​២០២៥នេះដែរ យើងសង្កេតឃើញក្រសួងអប់រំ យុវជន​ និងកីឡា បានចេញសេចក្ដីណែនាំឱ្យគ្រឹះស្ថានសិក្សាសាធារណៈ និងឯកជនដែលគ្រោង​រៀបចំ​ពិធីអបអរសាទរសង្ក្រាន្តខ្មែរ រួមគ្នាលេងល្បែង និងរបាំប្រជាប្រិយខ្មែរ ​ដើម្បី​ចូលរួមអភិរក្ស និងលើកកម្ពស់វប្បធម៌ខ្មែរ។ ក្រៅពីនេះ ក្រសួងពាក់ព័ន្ធនានា និងអ្នកជំនាញខាង​វប្បធម៌​ ក៏សុទ្ធតែបានបញ្ចេញគំនិតរបស់ខ្លួន ដើម្បីលើកទឹកចិត្ត និងជំរុញឱ្យយុវជនចូលរួម​លេង​ល្បែង និងរបាំប្រជាប្រិយខ្មែរដែរ។

ចំណែកឯអាជ្ញាធររាជធានី ខេត្ត ក្រុង ស្រុក ខណ្ឌ វិញ ក៏តែងខិតខំ​រៀបចំសង្ក្រាន្ត​នៅតាម​ដែនដីរបស់ខ្លួនដែរ ដែលក្នុងនោះ មានការរៀបចំល្បែងកម្សាន្តផ្សេងៗ​ រួមទាំង​ល្បែង និងរបាំប្រជាប្រិយខ្មែរ។ ​យោងតាមបទពិសោធប៉ុន្មានឆ្នាំ​ចុងក្រោយនេះ យើងសង្កេតឃើញថា យុវជនមួយចំនួនបានងាកមកចូលចិត្ត និងលេងល្បែងប្រជាប្រិយខ្មែរជាបណ្ដើរៗវិញហើយ។  យើង​សង្ឃឹមថា ក្នុងពេលអនាគត​ យុវជននឹងបន្តងាកមកចូលចិត្ត និងលេង​ល្បែង និងរបាំប្រជាប្រិយខ្មែរកាន់តែច្រើនឡើង។

ទោះបីជាយ៉ាងនេះក៏ដោយ ក៏ការលេង​ល្បែង និងរបាំប្រជាប្រិយខ្មែរមិនអាច​ងាកទៅ​រក​សភាពដើមដូចក្នុងអតីតកាលទាំងស្រុងបាន​ទេ  ពីព្រោះ ក្រៅពីឥទ្ធិពលនៃ​វប្បធម៌បរទេសមកលើសង្គមខ្មែរ ជាពិសេស មកលើយុវជន សង្គមខ្មែរខ្លួនឯង ជាពិសេស មនុស្សសម័យ​ថ្មីក៏បាន​ផ្លាស់ប្ដូររសជាតិ រសនិយមខ្លះដែរអំពីការលេង​ល្បែង និងរបាំប្រជាប្រិយខ្មែរ។ ហេតុនេះហើយ​បានជាយើងសង្កេតឃើញថាមនុស្សបច្ចុប្បន្នបានបង្កើត​ល្បែង និងរបាំថ្មីៗបន្ថែមទៀត ដើម្បី​បំពេញ​តម្រូវការនៃ​រសជាតិ ឬរសនិយមរបស់ពួកគេ។  

ការបង្កើតថ្មី ឬនវនុវត្តន៍ខាងវប្បធម៌ គឺជារឿងដែលគួរធ្វើ ​ដើម្បី​បំពេញសេចក្ដីត្រូវការរបស់មនុស្សជំនាន់ថ្មី ជាពិសេស ពួកយុវជន ប៉ុន្តែ ការបង្កើតទាំងនោះ ត្រូវផ្អែកលើមូលដ្ឋាននៃ​អត្តសញ្ញាណវប្បធម៌​ជាតិខ្មែរ កុំចម្លងពីវប្បធម៌បរទេសដែលអាចធ្វើឱ្យយើងបាត់បង់តម្លៃ និង​ចូលរួមផ្សព្វផ្សាយ​វប្បធម៌​បរទេសដោយមិនដឹងខ្លួន។ ហេតុនេះ បើចង់លើកម្ពស់ អភិរក្ស និងអភិវឌ្ឍសិល្បៈ វប្បធម៌ ក៏ដូចជា ​ល្បែង និងរបាំប្រជាប្រិយខ្មែរ ទាល់តែទាំងយុវជន ទាំងមនុស្សចាស់ និងតួអង្គពាក់ព័ន្ធទាំងអស់ចូលរួមគ្នា​សិក្សា ស្រាវជ្រាវ ប្រមូល ចងក្រង បង្ហាញ ផ្សព្វផ្សាយ និងចូលរួមលេង សម្ដែង ទស្សនា សិល្បៈ វប្បធម៌ ក៏ដូចជា ​ល្បែង និងរបាំប្រជាប្រិយខ្មែរទាំងអស់គ្នា ទើបពួកវាគង់វង្សយូរអង្វែង និងអាចរក្សាបាន​នូវអត្តសញ្ញាណនៃ​វប្បធម៌ខ្មែរ ក៏ដូចជា ការលើកកម្ពស់សង្ក្រាន្តខ្មែរ៕    

ដោយ៖ បណ្ឌិត ឈត ប៊ុនថង អ្នកជំនាញទស្សនវិជ្ជា និងអ្នកតាមដានកិច្ចសង្គមនៃ​រាជបណ្ឌិត្យសភាកម្ពុជា