សម្ដេច ហ៊ុន សែន រំលែកផ្ញើសាររំលែកទុក្ខដល់វៀតណាម ចំពោះការបាត់បង់អតីតប្រធានាធិ​បតី ជិន ឌឹកលឿង

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា នៅថ្ងៃទី២២ ខែឧសភា នេះ  ផ្ញើសារលិខិតចំនួនពីរផ្សេងគ្នា ទៅកាន់អគ្គលេខាធិការបក្សកុម្មុយនីស្តវៀតណាម លោក តូ ឡឹម និងប្រធានាធិបតីវៀតណាមបច្ចុប្បន្ន គឺលោក លឿង គឿង ដើម្បីរំលែកទុក្ខចំពោះការបាត់បង់ លោកជិន ឌឹក លឿង អតីតប្រធានាធិបតីវៀតណាម ដែលមរណៈភាពកាលពីថ្ងៃទី២០ ខែឧសភា ឆ្នាំ២០២៥។

សម្ដេច ហ៊ុន សែន ចាត់ទុកការបាត់បង់អតីតប្រធានាធិបតី លឿង ឌឹកគឿង ថាជាការបាត់បង់ដ៏ធំធេង និងរំលែកទុក្ខដ៏សែនក្រៀមក្រំ ចំពោះអគ្គលេខាធិការបក្សកុម្មុយនីស្ត រដ្ឋាភិបាល រដ្ឋសភា និងប្រជាជន វៀតណាម ជាពិសេសក្រុមគ្រួសារនៃសព។  

តាមរយៈសារលិខិតរំលែកទុក្ខ សម្ដេចតេជោ ហ៊ុន សែន មើលឃើញថា ក្នុងពេលកាន់តំណែងជាប្រធានាធិ​បតីវៀតណាម លោក ជិន ឌឹកលឿង បានរួមចំណែក ដើម្បីវឌ្ឍនភាពសង្គម និងទំនើបកម្មវៀតណាម។សម្ដេចតេជោ ហ៊ុន សែន អះអាងថា លោក ជិន ឌឹក លឿង នឹងត្រូវបានចងចាំជារៀងរហូត ថាជាមិត្តដ៏ពិតប្រាកដ និងយូរអង្វែង របស់កម្ពុជា និងជាឥស្សរជនដ៏សំខាន់មួយរូប ក្នុងការកសាងមិត្តភាពដ៏ជិតស្និទ្ធ និងកិច្ចសហប្រតិបត្តិ ការឈ្នះ-ឈ្នះ រវាងប្រទេសជាតិ និងប្រជាជនទាំងពីរ។

ប្រព័ន្ធផ្សព្វផ្សាយវៀតណាម រាយការណ៍ថា លោក ជិន ឌឹកលឿង កើតនៅឆ្នាំ១៩៣៧ និងធ្លាប់កាន់តំណែងកាន់តំណែងជាឧបនាយករដ្ឋមន្ត្រីពីឆ្នាំ១៩៩២ ដល់ឆ្នាំ១៩៩៧ រូបនេះ ទទួលមរណភាពនៅវេលាម៉ោងជិត១១យប់ ថ្ងៃទី២០ ខែឧសភា ឆ្នាំ២០២៥ ក្នុងវ័យ៨៨ឆ្នាំ  ដោយសារតែជរាពាធ និងជំងឺប្រចាំកាយរួបរឹត។

VOV ស្រង់សម្ដី ក្រុមគ្រូពេទ្យឯកទេសការពារសុខភាពមន្ត្រីជាន់ខ្ពស់វៀតណាម ផ្សាយថា ទោះបីជាមានការយកចិត្តទុកដាក់ព្យាបាលពីសំណាក់បក្ស រដ្ឋ ក្រុមសាស្រ្តាចារ្យ និងវេជ្ជបណ្ឌិត និងការយកចិត្តទុកដាក់ពីក្រុមគ្រួសារយ៉ាងណាក្តី ក៏អតីតប្រធានាធិបតីវៀតណាមទី៦ កាន់តំណែងរយៈពេល៩ឆ្នាំ ចាប់ពីឆ្នាំ១៩៩៧ ដល់ឆ្នាំ២០០៦នេះ នៅតែមិនអាចគេចផុតពីការស្លាប់នៅគេហដ្ឋានរបស់លោកក្នុងទីក្រុងហាណូយបានឡើយ។

មកទល់នឹងល្ងាចថ្ងៃទី២២ ខែឧសភា នេះ ប្រព័ន្ធផ្សព្វផ្សាយធំៗវៀតណាម មិនទាន់រាយការណ៍អំពីព័ត៌មានលម្អិតដែលទាក់ទងនឹងពិធីគោរពវិញ្ញាណក្ខន្ធ ពិធីបុណ្យសព និងពិធីបញ្ចុះសពអតីតប្រធានាធិបតីវៀតណាមរូបនេះនៅឡើយទេ៕

ដោយ៖ ង៉ិល ណារ៉ាត់