កីឡា

យប់នេះ កម្ពុជា អាចឈ្នះ កោះហ្គាំ បានទេវគ្គជម្រុះ AFC Asian Cup?

បានផុស

៥ years មុន

នៅ

ថ្ងៃសៅរ៍ ៩ តុលា ២០២១

ដោយ

ក្រុមបាល់ទាត់ជម្រើសជាតិកម្ពុជាត្រូវប្រកួតជើងទី១ជាមួយក្រុមជម្រើសកោះហ្គាំក្នុងយុទ្ធនាការណ៍វគ្គជម្រុះពានរង្វាន់ទ្វីបអាស៊ី AFC Asian Cup Qualification Play-off Round វេលាម៉ោង០០:៣០នាទី ឬ១២:៣០នាទីយប់នៅប្រទេសបារ៉ែនដោយមានការផ្សាយផ្ទាល់លើផេក សហព័ន្ធកីឡាបាល់ទាត់កម្ពុជា និង Smart។

ការប្រកួតនេះដើម្បីស្វែងរកកៅអីឡើងទៅវគ្គចែកពូលដែលប្រទេសចិនធ្វើជាម្ចាស់ផ្ទះ ខណៈកម្ពុជា និងកោះហ្គាំត្រូវធ្វើការប្រកួតពីរជើងនៅទឹកដីកណ្តាលទាំងពីរជើងពោលគឺនៅ The Khalifa Sports City Stadium ប្រទេសបារ៉ែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមទាំងពីរមានប្រវត្តិជួបគ្នាពីរលើក ហើយមានកំណត់ត្រាឈ្នះ និងចាញ់ម្តងម្នាក់ដូចគ្នា។ ការប្រកួតលើកទី១ កម្ពុជា បានយកឈ្នះ កោះហ្គាំ ដោយលទ្ធផល ៣-០ ក្នុងពានរង្វាន់ AFC Challenge Cup កាលពីថ្ងៃទី៦ ខែមេសា ឆ្នាំ២០០៦។

៣គ្រាប់របស់កម្ពុជាធ្វើបានសម្រេចដោយកីឡាករ សាន់ ប៊ុនហេង គ្រាប់ទី២ដោយ កីឡាករ កែវ កុសល និងគ្រាប់ទី៣ដោយ គួច សុកុម្ភៈ ដែលមានវត្តមានសម្រាប់ការប្រកួតយប់នេះដែរ។ ចំណែកការប្រកួតទី២ កម្ពុជាចាញ់កោះហ្គាំ ០-២ ក្នុងជំនួបមិត្តភាពក្នុងឆ្នាំ២០១៣។

អ្នកចាត់ការជម្រើសជាតិកម្ពុជាលោក Honda ចូលរួមហ្វឹកហាត់

សម្រាប់ស្ថិតិប្រកួត៥លើកចុងក្រោយរបស់ក្រុមទាំងពីរមានលទ្ធផលមិនល្អដូចគ្នា៖

៥ប្រកួតចុងក្រោយរបស់កម្ពុជា

កម្ពុជា ១-១ ម៉ុងហ្គោលី
ហុងកុង ២-០ កម្ពុជា
បារ៉ែន ៨-០ កម្ពុជា
អ៉ីរ៉ាក់ ៤-១ កម្ពុជា
កម្ពុជា ០-១០ អ៉ីរ៉ង់

ក្រុមកម្ពុជាហ្វឹកហាត់នៅបារ៉ែនត្រៀមខ្លួនប្រកួត

៥ប្រកួតចុងក្រោយរបស់កោះហ្គាំ

ស៊ីរី ៤-០ ហ្គាំ
ម៉ាឌីវ ៣-១ ហ្គាំ
ហ្គាំ ០-៧ ចិន
ហ្គាំ ០-៣ ស៊ីរី
ហ្វីលីពីន ៣-០ ហ្គាំ

រយៈពេល៣ថ្ងៃក្រោយពោលគឺនៅថ្ងៃទី១២ ខែតុលា នេះ ក្រុមទាំងពីរនឹងប្រកួតជើងទី២នៅកីឡដ្ឋានដដែលវេលាម៉ោង១១យប់ដើម្បីយកក្រុមឈ្នះមួយឡើងទៅវគ្គចែកពូលដែលជាជុំផ្តាច់ព្រ័ត្រ 2023 Asian Cup ពីថ្ងៃទី១៦ ខែមិថុនា ដល់ ទី១៦ ខែកក្កដា ឆ្នាំ២០២៣ នៅប្រទេសចិន។

រហូតដល់ពេលនេះ មានក្រុមកំពូលទាំង១១ប្រទេសមកពីជុំទី៣ មានកៅអីជុំផ្តាច់ព្រ័ត្ររួចហើយដូចជា ប្រទេសចិន ស៊ីរី អ៊ីរ៉ង់ កាតារ ជប៉ុន អូម៉ង់ អារ៉ាប់រួម កូរ៉េខាងត្បូង អ៊ីរ៉ាក់ វៀតណាម លីបង់ អូស្ត្រាលី និងអារ៉ាប៊ីសាអូឌីត៕