កីឡា

កីឡាការិនីឆ្នើម ស្រួង ភាវី បង្ហាញមហិច្ឆតាចង់ប្រកួតស៊ីហ្គេម២០២៣

បានផុស

២ years មុន

នៅ

ថ្ងៃអង្គារ ១២ កក្កដា ២០២២

ដោយ

កីឡាការិនីស្នូឃ័រឆ្នើមកម្ពុជា ស្រួង ភាវី ពិតចង់តំណាងជាតិដើម្បីចូលរួមប្រកួតក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលប្រទេសកម្ពុជាទទួលរៀបចំធ្វើជាម្ចាស់ផ្ទះលើកដំបូងក្នុងប្រវត្តិសាស្ត្រ។

បង្ហាញអារម្មណ៍នៅលើ Facebook កីឡាការិនីដើមកំណើតនៅខេត្តត្បូងឃ្មុំ ស្រួង ភាវី បានសរសេរថា ៖«ជម្រាបសួរបងប្អូនជនរួមជាតិជាទីស្នេហា បើប្រភេទកីឡាប៊ីយ៉ាការ៉ុម របស់ខ្ញុំអាចដាក់បញ្ចូលក្នុងស៊ីហ្គេម ២០២៣ ហើយក្នុងនាមខ្ញុំជាកូនស្រីខ្មែរ តំណាងកម្ពុជាចូលរួមប្រកួត តើបងប្អូន គ្រាំទ្រប្រភេទកីឡាប៊ីយ៉ាស្នូឃ័រការ៉ុមខ្ញុំដែរឬទេ?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារខាងលើនេះមហាជនដែលស្គាល់នាងពិតជាគាំទ្រ និងចង់ឃើញនាងចូលរួមប្រកួតកីឡាស៊ីហ្គេម ឆ្នាំ២០២៣ណាស់ ពីព្រោះនាងជាកីឡាការិនីមានសក្តានុពលមួយរូប។

ពាក់ព័ន្ធនឹងចំណុចនេះដែរ ស្រួង ភាវី បានប្រាប់«កម្ពុជាថ្មី»ថា ៖«ខាងសហព័ន្ធរបស់ខ្ញុំបានដាក់លិខិតស្នើសុំទៅហើយ។ សហព័ន្ធនៅខ្មែរហ្នឹង បើដាក់ស្នើសុំបានសម្រេច ខ្ញុំនឹងអាចចូលរួមប្រកួតបាន»។

សូមបញ្ជាក់ថា កម្ពុជាបានកំពុងរៀបចំកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍ និងក្រុមប្រឹក្សាសហព័ន្ធកីឡាអាស៊ានប៉ារ៉ា នៅសណ្ឋាគារសុខាចាប់ពីថ្ងៃទី១១ដល់ទី១៣ ខែកក្កដានេះដើម្បីត្រៀមខ្លួន ក៏ដូចជាសម្រេចលើប្រភេទកីឡា។ នៅមិនទាន់ដឹងច្បាស់ថា ប្រភេទកីឡាប៊ីយ៉ាការ៉ុមស្ថិតក្នុងរបៀបវារៈដែលនឹងត្រូវសម្រេចសម្រាប់ស៊ីហ្គេមឆ្នាំ២០២៣ឬយ៉ាងណានោះទេ។ តាមការគ្រោងទុក នៅថ្ងៃចុងក្រោយនៃកិច្ចប្រជុំគឺនៅថ្ងៃទី១៣ កក្កដាស្អែកនេះ ចំនួនប្រភេទកីឡាទាំងអស់នឹងត្រូវបានប្រកាសជាផ្លូវការសម្រាប់ស៊ីហ្គេម ឆ្នាំ២០២៣នៅកម្ពុជា។

តាមពិតទៅ កីឡាស្នូឃ័រលើវិញ្ញាសាប៊ីយ៉ាស្នូឃ័រការ៉ុមដែលជាជំនាញរបស់កីឡាការិនី ស្រួង ភាវី មិនធ្លាប់ត្រូវបានដាក់ឲ្យប្រកួតជាផ្លូវការក្នុងកីឡាស៊ីហ្គេមទេ។ យ៉ាងណា ក្នុងនាមកម្ពុជាជាម្ចាស់ផ្ទះសម្រាប់ឆ្នាំ២០២៣មានសិទ្ធិក្នុងការបញ្ចូលវិញ្ញាសាថ្មីនេះ ប៉ុន្តែត្រូវការមានប្រទេសបីឬបួនទៀតគាំទ្រទើបអាចប្រកួតបាន។

ស្រួង ភាវី ទើបតែសាងស្នាដៃថ្មីដ៏រំភើបរីករាយចំពោះមុខឪពុកម្តាយបង្កើតរបស់ខ្លួននៅលើទឹកដីនៃប្រទេសកូរ៉េខាងត្បូង បន្ទាប់ពីនាងបានឈ្នះជើងឯកកីឡាប៊ីយ៉ាការ៉ុមលំដាប់ពិភពលោក PBA-LPBA Championship៕

អត្ថបទ៖ វីរបុត្រ