រសៀលនេះ នារីកម្ពុជា សម្លឹង​ឱកាស​បង្កើត​កំណត់​ត្រា​ទី២ ប៉ះ ទីម័រ​ខាង​កើត

ក្រុមបាល់ទាត់ជម្រើសជាតិនារីកម្ពុជាត្រូវជួបក្រុមនារីទីម័រខាង​កើត​ វេលាម៉ោង៣:០០នាទីរសៀល វគ្គពាក់កណ្ដាលផ្ដាច់ព្រ័ត្រ ពានរង្វាន់ AFF Women’s Cup 2024 នៅ​ប្រទេស​ឡាវ។

ក្រុមនារីកម្ពុជាបានបង្កើតប្រវត្តិសាស្រ្ដថ្មីក្នុងពានរង្វាន់ AFF Women’s Cup បន្ទាប់ឆ្លងផុតវគ្គសន្សំពិន្ទុលើកដំបូង។ ជាថ្មីម្ដងទៀតនៅរសៀលនេះ ក្រុមនារីកម្ពុជាត្រៀមបង្កើតប្រវត្តិសាស្រ្ត​បន្ថែម​មួយ​ទៀត​។ ប្រសិន​បើ​ឈ្នះ ទីម័រ​ខាង​កើត ក្រុម​នារី​កម្ពុជា នឹង​​បង្កើត​កំណត់​ត្រា​ឡើង​វគ្គផ្ដាច់ព្រ័ត្រជាលើកដំបូង។

ក្រោមការដឹកនាំរបស់លោក ឃួន ឡាបូរ៉ាវី ឆ្លងកាត់ការប្រកួត២លើកក្នុងវគ្គសន្សំពិន្ទុ កម្ពុជាឈ្នះ១ ស្មើ១ មាន៤ពិន្ទុ ឈរនៅលេខ១ ក្នុងពូល B។ ចំណែកក្រុមនារីទីម័រខាង​កើត ក្នុងកាប្រកួត២លើកក្នុងវគ្គសន្សំពិន្ទុកន្លងមក ស្មើ​ទាំង​២លើក មាន២ពិន្ទុ ឈរលេខ២ ក្នុងពូល A។

សមត្ថភាពរបស់ក្រុមកម្ពុជា និងទីម័រខាង​កើត ហាក់មិនភាពខុសគ្នាខ្លាំង​ប៉ុន្មាន​ទេ។ នេះហើយជាមូលហេតុដែលធ្វើឲ្យក្រុមនារីកម្ពុជា អាចមាន​ឱកាស​ឡើងទៅផ្ដាច់ព្រ័ត្រលើកដំបូង។

លោក ឃួន ឡាបូរ៉ាវី គ្រូបង្វឹកក្រុមបាល់ទាត់ជម្រើសជាតិនារីកម្ពុជា ធ្លាប់បានលើកមុនពេលចាប់ផ្ដើមការប្រកួតវគ្គសន្សំពិន្ទុ សម្រាប់ក្រុម​នារី​កម្ពុជា​តាំងពីចាប់ផ្ដើមដំបូងគឺមកទីនេះដើម្បីឈ្នះ។ «ខ្ញុំមើលឃើញ​ថា ក្រុមទាំងអស់នៅក្នុងព្រឹត្តិការណ៍មានកម្រិតប្រហែលយើងដែរ។ យើងអាចប្រកួតប្រជែងជាមួយពួកគេបាន»។

ក្រុម​នារីកម្ពុជា​ត្រៀមខ្លួនបានយ៉ាងក្នុងការប្រកួតឆ្នាំនេះ ដោយសហព័ន្ធ​បាល់ទាត់​កម្ពុជា​បានបង្កើតលីគ​នារី ដើម្បីពង្រឹងសមត្ថភាពកីឡាការិនីឡើងវិញ ​ដើម្បី​ការ​ត្រៀម​ខ្លួន​សម្រាប់​ពាន​រង្វាន់​អន្តរជាតិ​មាន​ដូច​ជា​ AFF Women’s Cup 2024 និង​សុីហ្គេម ជា​ដើម៕

អត្ថបទ៖ ផា រតនា