Facebook ដាក់កម្មវិធីថ្មីលើ Instagram ដើម្បីគ្រប់គ្រងអ្នកប្រើប្រាស់វ័យក្មេងអាយុក្រោម ១៣ ឆ្នាំ

ប្រព័ន្ធផ្សព្វផ្សាយសង្គមយក្សរបស់អាមេរិក Facebook និយាយថា ក្រុមហ៊ុននឹងណែនាំការគ្រប់គ្រងថ្មីសម្រាប់អ្នកប្រើប្រាស់ Instagram វ័យក្មេង ចំពេលមានការរិះគន់ចំពោះការអភិវឌ្ឍន៍កម្មវិធីថ្មីសម្រាប់កុមារ ។

ទន្ទឹមនោះ Facebook បានផ្អាកការងារបណ្តោះអាសន្នលើកម្មវិធី “Instagram Kid” សម្រាប់កុមារអាយុក្រោម ១៣ ឆ្នាំ ។

ក្រុមហ៊ុនត្រូវបានគេរិះគន់ចំពោះការបន្តអភិវឌ្ឍកម្មវិធីថ្មី ក្រោយការសិក្សាបង្ហាញថា Instagram អាចបំពុល និងមានផលប៉ះពាល់អាក្រក់ដល់សុខភាពផ្លូវចិត្តរបស់កុមារ ។

ស្របពេលជាមួយគ្នានេះ នាយកប្រតិបត្តិក្រុមហ៊ុន Facebook លោក Nick Clegg ដែលបង្ហាញខ្លួននៅលើទូរទស្សន៍ ABC និងបណ្តាញទូរទស្សន៍ផ្សេងទៀតកាលពីថ្ងៃអាទិត្យ បានបង្ហាញពីមុខងារថ្មីសម្រាប់អ្នកប្រើប្រាស់ Instagram ។

លោកបាននិយាយថា លក្ខណៈពិសេសមួយគឺថា ប្រសិនបើក្មេងជំទង់មើលខ្លឹមសារដែលមិនអំណោយផលដល់សុខុមាលភាពរបស់ពួកគេម្តងហើយម្តងទៀត ពួកគេនឹងធុញទ្រាន់ ។ មួយទៀតជំរុញឲ្យពួកគេឈប់លេង ប្រសិនបើពួកគេបានប្រើ Instagram អស់រយៈពេលជាយូរមកហើយ ។

លោក Clegg បាននិយាយថា វាមិនច្បាស់ទេថាតើគំនិតផ្តួចផ្តើមថ្មីនេះ នឹងជួយឲ្យក្រុមហ៊ុនបន្តការអភិវឌ្ឍកម្មវិធី “Instagram Kids” ឬយ៉ាងណា ព្រោះសមាជិកសភាកំពុងជំរុញឲ្យលុបចោលគម្រោងនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កាលពីថ្ងៃសុក្រ Facebook, Instagram និង WhatsApp គាំងម្ដងទៀត