រុស្ស៊ី រៀបចំបាញ់មីស៊ីលថ្ងៃនេះ ក្រោមការដឹកនាំផ្ទាល់របស់លោក ពូទីន

ក្រសួងការពារជាតិរុស្ស៊ីបានប្រកាសថា ខ្លួននឹងធ្វើសមយុទ្ធបាញ់មីស៊ីលនៅថ្ងៃសៅរ៍នេះ ក្រោមការដឹកនាំរបស់ប្រធានាធិបតី វ្ល៉ាឌីមៀ ពូទីន ។

ក្រសួងបាននិយាយកាលពីថ្ងៃសុក្រថា សមយុទ្ធនេះត្រូវបានរៀបចំឡើងដើម្បីសាកល្បងការត្រៀមខ្លួនជាស្រេចនៃការទប់ស្កាត់ជាយុទ្ធសាស្ត្រ រួមទាំងកងកម្លាំងនុយក្លេអ៊ែរផងដែរ ។

សមយុទ្ធនេះក៏នឹងមានការចូលរួមពីកងកម្លាំងដែនអាកាស កងកម្លាំងមីស៊ីលយុទ្ធសាស្ត្រ កងនាវាចរសមុទ្រខ្មៅ និងកងនាវាចរខាងជើងផងដែរ ។

ក្រសួងបាននិយាយថា មីស៊ីលផ្លោង និងមីស៊ីលបាញ់នាំផ្លូវ នឹងត្រូវបាញ់បង្ហោះ ហើយលោកប្រធានាធិបតី ពូទីន នឹងត្រួតពិនិត្យសមយុទ្ធនេះដោយផ្ទាល់ ។

ទន្ទឹមនោះ អ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីថ្ងៃសុក្រថា សមយុទ្ធនេះមានតម្លាភាព និងមិនគួរជាមូលហេតុសម្រាប់ការព្រួយបារម្ភនោះទេ ។

ប៉ុន្តែអ្នកសង្កេតការណ៍ខ្លះនិយាយថា វិធានការនេះទំនងជាមានគោលបំណងដាក់សម្ពាធយោធា ចំពេលមានភាពតានតឹងដែលកំពុងបន្តលើអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ហោះហើរយន្តហោះទម្លាក់គ្រាប់បែក ១០ គ្រឿងលើតំបន់ គ្រីមៀ