ភ្លៀងធ្លាក់ខ្លាំង៣ថ្ងៃ ផ្តាច់ជីវិតមនុស្ស ៧នាក់ នៅ វៀតណាម

ខេត្ត Nghe An ភាគកណ្តាលប្រទេសវៀតណាម មានមនុស្សស្លាប់ចំនួន ៧នាក់ និងផ្ទះជាង ១៧ ៤០០ខ្នង ត្រូវបានជន់លិច បន្ទាប់ពីភ្លៀងធ្លាក់ខ្លាំងរយៈពេលបីថ្ងៃ។

គណៈកម្មាធិការបង្ការគ្រោះមហន្តរាយធម្មជាតិខេត្ត Nghe An បាននិយាយកាលពីថ្ងៃសុក្រទី៣០ខែកញ្ញាថា ជនរងគ្រោះ ត្រូវបានទឹកហូរនាំយកទៅ ខណៈកំពុងឆ្លងស្ពាន ឬប្រថុយជីវិតទៅចាប់ត្រី អំឡុងពេលមានទឹកជំនន់។

កម្ពស់ទឹក ក៏ហក់ឡើងជិតកន្លះម៉ែត្រផងដែរ នៅលើផ្លូវជាតិលេខ១A ដែលជាហេតុបង្កបញ្ហាដល់ការធ្វើចរាចរណ៍។

ដោយសារឥទ្ធិពលនៃព្យុះ ណូរុ, ស្រុក និងទីប្រជុំជនជាច្រើនក្នុងខេត្ត Nghe An បានកត់ត្រា ភ្លៀងធ្លាក់ពី ២០០ ទៅ ៦០០ មិល្លីម៉ែត្រ ចាប់ពីថ្ងៃទី ២៧ ដល់ ២៩ ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ជាថ្មី ព្យុះ ណូរុ បានបោកបក់ក្នុងទីក្រុង Da Nang និងខេត្ត Quang Nam នៅម៉ោង ១ រំលងអធ្រាត្រថ្ងៃពុធ ជាមួយនឹងល្បឿនខ្យល់អតិបរមា ១៣៣ គីឡូម៉ែត្រក្នុងមួយម៉ោង ធ្វើឲ្យវាក្លាយជាព្យុះដ៏មានឥទ្ធិពលបំផុតមួយ ដែលវាយប្រហារប្រទេសវៀតណាមក្នុងរយៈពេល ២ ទសវត្សរ៍ចុងក្រោយ។

កាលពី​ព្រឹក​ថ្ងៃ​ពុធ ណូរុ ​បាន​រំកិល​ទៅ​ប្រទេស​ឡាវ ហើយ​ចុះ​ខ្សោយ​ទៅ​ជា​ព្យុះ​ត្រូពិក៕

ប្រែសម្រួល៖ Vann Vann

ប្រភព៖ VN Express

ចុចអាន៖ វៀតណាម ក៏មានមនុស្សស្លាប់ ដោយសារព្យុះ Noru ដែរ