កងសន្តិសុខលោក គីម ជុងអ៊ុន បាញ់ថ្នាំសម្លាប់មេរោគលើកៅអីខ្លាចមាន​ជាតិពុល មុនអង្គុយប្រជុំជាមួយលោក ពូទីន (មានវីដេអូ)

កាសែត Kommersant បានរាយការណ៍កាលពីពេលថ្មីនេះថា កងសន្តិសុខរបស់មេដឹកនាំកូរ៉េខាងជើងលោក គីម ជុងអ៊ុន បានចំណាយពេលជាច្រើននាទីដើម្បីធ្វើការសម្លាប់មេរោគនៅលើកៅអីដែលលោក គីម អង្គុយក្នុងកិច្ចប្រជុំកំពូលជាមួយលោកប្រធានាធីបតីរុស្ស៊ី វ្ល៉ាឌីមៀរ ពូទីន ។

ក្នុងវីដេអូ​ដែល​បាន​ចុះ​ផ្សាយ​ដោយ​កាសែត​រុស្ស៊ីមួយនេះបាន​បង្ហាញ​ពី​មន្ត្រី​សន្តិសុខ​កូរ៉េ​ខាង​ជើង​ពាក់​ស្រោម​ដៃ​ពណ៌​សបានបាញ់ថ្នាំសម្លាប់មេរោគជុំវិញកៅអី ហើយបានជូតពេញមួយតួកៅអីនោះយ៉ាងប្រុងប្រយ័ត្ន ដោយសារតែខ្លាចមានជាតិពុល ខណៈថ្នាំបាញ់សម្លាប់មេរោគនោះមិនត្រូវបានគេស្គាល់ម៉ាកនោះទេ ។

មិនត្រឹមតែភ័យខ្លាចមានជាតិពុលនៅលើកៅអីប៉ុណ្ណោះទេ កងសន្តិសុខរបស់លោក គីម ជុងអ៊ុន ថែមទាំងត្រួតពិនិត្យលើកៅអីនោះថាតើអាចទ្រនូវទម្ងន់របស់មេដឹកនាំកូរ៉េខាងជើងរូបនេះបានឬក៏អត់ផងដែរ ដោយសារតែលោក គីម មានទម្ងន់រហូតទៅដល់ ១២០ គីឡូក្រាមឯណោះ ។

ពាក់ព័ន្ធនឹងបញ្ហានេះដែរលោក Andrei Kolesnikov អ្នកឆ្លើយឆ្លងព័ត៌មានរបស់កាសែត Kommersant ប្រចាំវិមានក្រឹមឡាំងបានសរសេរថា “កងសន្តិសុខរបស់លោក គីម ម្នាក់ក្នុងចំណោមកងសន្តិសុខជាង ១០០ នាក់ មិនពេញចិត្តនឹងកៅអីទីមួយដែលខាងរុស្ស៊ីរៀបចំជូនលោក គីម អង្គុយឡើយ ខណៈបន្តិចក្រោយមកពិធីការរបស់រុស្ស៊ីក៏បានយកកៅអីមួយទៀតដូចគ្នាបេះបិទទៅនឹងកៅអីទីមួយមកឲ្យលោក គីម ។

គួរបញ្ជាក់ថា នៅក្នុងកិច្ចពិភាក្សាកិច្ចប្រជុំកំពូលកាលពីថ្ងៃពុធក្នុងតំបន់ចុងបូព៌ារបស់រុស្ស៊ី, លោក ពូទីន និងលោក គីម បានពិភាក្សាគ្នាអំពីបញ្ហាយោធា សង្គ្រាមនៅអ៊ុយក្រែន និងជំនួយរុស្ស៊ីដែលអាចធ្វើទៅបានសម្រាប់កម្មវិធីផ្កាយរណបរបស់កូរ៉េខាងជើង ខណៈក្រោយចប់កិច្ចប្រជុំនោះទាំងលោក គីម និងលោក ពូទីន បានផ្តល់កាដូជាកាំភ្លើងវែងឲ្យគ្នាទៅវិញទៅមកផងដែរ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Rueters

ចុចអាន ៖ ក្រៅពីសម្ដេចធិបតី ហ៊ុន ម៉ាណែត តើថ្នាក់ដឹកនាំប្រទេសណាទៀតចូលរួម ពិព័រណ៍ ចិន-អាស៊ាន ថ្ងៃនេះ?