យោធាមីយ៉ាន់ម៉ា​បន្តការ​វាយ​ប្រហារ​តាម​អាកាស​ទោះបីមាន​​រញ្ជួយ​ដី​ក៏​ដោយ

កាសែត Bangkok Post នៅថ្ងៃទី៣១ខែមីនានេះបានឲ្យដឹងថា របបយោធា​មីយ៉ាន់ម៉ាបានបន្តការវាយប្រហារតាមអាកាសរបស់ខ្លួន បើទោះបីជាមានការរញ្ជួយដីដ៏ខ្លាំងក្លា​នៅ​ក្នុង​ប្រទេសក៏ដោយ ដែល​បណ្ដាល​ឲ្យ​​ក្រុមឧទ្ទាម​ចំនួន​៧នាក់ត្រូវបានសម្លាប់។

ការរញ្ជួយដីកម្រិត៧.៧ រ៉ិចទ័រ កាលពីថ្ងៃសុក្រ ដែលឆក់​យក​ជីវិត​មនុស្សជិតបីពាន់នាក់មកដល់ពេលនេះ និង​បំផ្លាញផ្ទះ និងអគាររាប់ពាន់ខ្នង បានជំរុញឱ្យក្រុមប្រដាប់អាវុធមួយចំនួនផ្អាកអរិភាព ខណៈពេលដែលប្រទេស​ខ្លួន​កំពុងដោះស្រាយវិបត្តិ។ ប៉ុន្តែក្រុមយុទ្ធជនមកពីកងទ័ពរំដោះប្រជាជន Danu ដែលជាក្រុមប្រដាប់អាវុធជនជាតិភាគតិចសកម្មនៅក្នុងរដ្ឋ Shan ភាគខាងជើង បាននិយាយថា ពួកគេត្រូវបានវាយប្រហារ​តាម​ដែន​អាកាសភ្លាមៗបន្ទាប់ពីការរញ្ជួយដីបានកើតឡើង។

សមាជិក​ម្នាក់​របស់ Danu ​​បាន​ប្រាប់ AFP ថា យន្តហោះ​យោធា​ចំនួន ៥ គ្រឿង​បាន​វាយប្រហារ​មូលដ្ឋាន​របស់​ពួកគេ​ក្នុង​សង្កាត់ Naungcho ដោយ​បាន​សម្លាប់​អ្នក​ប្រយុទ្ធ ៧ នាក់​ ក្នុងនោះមានទាហានស្រី៥នាក់ស្លាប់ភ្លាមៗនៅនឹងកន្លែង។ លើសពីនេះក៏មានរបាយការណ៍ពីការវាយប្រហារតាមអាកាសផ្សេងទៀតចាប់តាំងពីការរញ្ជួយដីមក ប៉ុន្តែ AFP មិនអាចផ្ទៀងផ្ទាត់ព័ត៌មានលម្អិតបានទេ។

គួរបញ្ជាក់ថា យោធាមីយ៉ាន់ម៉ាបានងាកទៅរកការវាយប្រហារតាមអាកាសកាន់តែខ្លាំងឡើង ខណៈដែលខ្លួនព្យាយាមដណ្តើមយកទឹកដីពីក្រុមអ្នកប្រយុទ្ធប្រឆាំងរដ្ឋប្រហារ និងក្រុមប្រដាប់អាវុធជនជាតិភាគតិច។ នៅក្នុងសង្គ្រាមស៊ីវិលនេះ យោធាបានរងបរាជ័យក្នុងសមរភូមិដ៏ធំក្នុងរយៈពេលមួយឆ្នាំកន្លះកន្លងមក ដោយបាត់បង់ការគ្រប់គ្រងលើទឹកដីជាច្រើនកន្លែង។ ទោះបីកងកម្លាំងជើងគោករបស់ខ្លួនចាញ់ប្រៀប យោធាមីយ៉ាន់ម៉ានៅតែរក្សាបាននូវឧត្តមភាពផ្លូវអាកាស ដោយសារយន្តហោះចម្បាំងដែលផ្តល់ដោយរុស្ស៊ីជាសម្ព័ន្ធមិត្តយូរអង្វែងរបស់ខ្លួន និងជាអ្នកផ្គត់ផ្គង់អាវុធធំ។

យោងតាមអង្គការមិនរកប្រាក់ចំណេញ Armed Conflict Location and Event Data (ACLED) ចំនួននៃការវាយប្រហារតាមផ្លូវអាកាសរបស់យោធាទៅលើជនស៊ីវិលបានកើនឡើង​ជិត ៨០០​ដង ក្នុងឆ្នាំ២០២៤ សម្រាប់​សង្រ្គាមស៊ីវិល​ដែល​​អាយុកាល​ ៤ ឆ្នាំ​មក​នេះ។ តួលេខនេះគឺច្រើនជាងបីដងកាលពីឆ្នាំ​២០២៣ ហើយ ACLED បានព្យាករថា របបយោធានឹងបន្តពឹងផ្អែកលើការវាយប្រហារតាមអាកាស​បន្ថែម​ទៀត ខណៈ​ការ​វាយ​ប្រហារ​តាម​ដី​គោក​កំពុង​ចាញ់​​ប្រៀប​សត្រូវ៕

អត្ថបទ៖ ប៊ុន សុភាព