វៀតណាម ឲ្យអ្នកដំណើរចាក់វ៉ាក់សាំងពេញដូសធ្វើចត្តាឡីស័ក កន្លែងណាក៏បាន

ឧបនាយករដ្ឋមន្ត្រីវៀតណាមលោក Vu Duc Dam បាននិយាយកាលពីថ្ងៃពុធថា អ្នកធ្វើដំណើរដែលត្រូវបានចាក់វ៉ាក់សាំងពេញដូសអាចធ្វើចត្តាឡីស័កនៅ ផ្ទះ ឬកន្លែងស្នាក់នៅ ផ្សេងៗតាមជម្រើសរបស់ពួកគេសម្រាប់រយៈពេលជាក់លាក់ណាមួយ ។

លោក Dam បាននិយាយនៅ ក្នុងកិច្ចប្រជុំមួយកាលពីថ្ងៃពុធថា ក្រសួងសុខាភិបាលចាំបាច់ត្រូវចេញសេចក្តីណែនាំថ្មីស្តីពីការធ្វើចត្តាឡីស័កមិនលើសពីថ្ងៃទី ១៥ ខែធ្នូ ខណៈវានឹងដកចេញនូវតម្រូវការធ្វើចត្តាឡីស័កក្នុងកន្លែងដែលបានកំណត់សម្រាប់ការមកដល់នាពេលបច្ចុប្បន្ននេះ ។

លោកបាននិយាយថា មានតែអ្នកមិនបានចាក់វ៉ាក់សាំងប៉ុណ្ណោះ ដែលនៅ តែត្រូវដាក់ការធ្វើចត្តាឡីស័កនៅ ក្នុងមណ្ឌលកណ្តាល ឬកន្លែងដែលបានកំណត់ដោយរដ្ឋាភិបាល និងត្រូវបានចាក់វ៉ាក់សាំងនៅ ទីនោះតែម្ដង ។

ចាប់តាំងពីខែសីហា ក្រសួងសុខាភិបាលតម្រូវឲ្យអ្នកដំណើរដែលទទួលការចាក់វ៉ាក់សាំងពេញដូស ហើយតេស្តម៉ាស៊ីនធំ PCR អវិជ្ជមានកូវីដ ត្រូវបានដាក់ឲ្យធ្វើចត្តាឡីស័កក្នុងកន្លែងដែលបានកំណត់រយៈពេល ៧ ថ្ងៃ និងតាមដានសុខភាពរបស់ពួកគេដោយខ្លួនឯងរយៈពេល ៧ ថ្ងៃបន្ទាប់ ខណៈច្បាប់នេះអនុវត្តដូចគ្នាចំពោះអ្នកដែលបានជាសះស្បើយពីកូវីដក្នុងរយៈពេល ៦ ខែ ឬតិចជាងនេះ ។

ទន្ទឹមនោះ នៅ ក្នុងរលកឆ្លងចុងក្រោយដែលបានវាយប្រហារប្រទេសវៀតណាមកាលពីចុងខែមេសា ករណីជាង ១.៣៥ លានករណីត្រូវបានរាយការណ៍ ហើយ ១.០៣ លានករណីបានជាសះស្បើយ ខណៈរហូតមកដល់ពេលនេះមនុស្ស ៥៥.៥ លាននាក់បានចាក់វ៉ាក់សាំងពេញដូស ។

គួរបញ្ជាក់ថា ប្រទេសវៀតណាមបានស្វាគមន៍អ្នកជំនាញបរទេស និងកម្មករជំនាញខ្ពស់ជាង ២០០,០០០ នាក់ ចាប់តាំងពីការចាប់ផ្តើមនៃជំងឺរាតត្បាតកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ VNExpress

ចុចអាន ៖ វៀតណាម ព្រមានថា ហានិភ័យការជ្រៀតចូល Omicron ក្នុងប្រទេសគឺ “ខ្ពស់​ណាស់”