ឥណ្ឌូណេស៊ី ប្រកាសបង្កើតក្រុមស្វែងរកការពិត ករណីរត់ជាន់គ្នាក្នុងកីឡដ្ឋាន បាល់ទាត់

ប្រទេសឥណ្ឌូណេស៊ី នឹងបង្កើតក្រុមស្វែងរកការពិតឯករាជ្យមួយ ដើម្បីស៊ើបអង្កេតការរត់ជាន់គ្នាក្នុងកីឡដ្ឋានបាល់ទាត់ ដែលបណ្តាលឲ្យមនុស្ស ១២៥ នាក់ស្លាប់។

រដ្ឋមន្ត្រីក្រសួងសម្របសម្រួលកិច្ចការនយោបាយ ច្បាប់ និងសន្តិសុខឥណ្ឌូណេស៊ី លោក Mahfud MD បាននិយាយថា ការស៊ើបអង្កេតលើសោកនាដកម្មកាលពីយប់ថ្ងៃសៅរ៍នៅទីក្រុង Malang មានគោលបំណងរកឲ្យឃើញនូវអ្វីដែលបានកើតឡើង និងកំណត់អត្តសញ្ញាណជនល្មើស។

គ្រោះមហន្តរាយនេះ បានចាប់ផ្តើមបន្ទាប់ពីក្រុមបាល់ទាត់ Arema ប្រកួតចាញ់ក្រុមភ្ញៀវ ក្នុងដីខ្លួនឯងជាលើកដំបូងសម្រាប់រយៈពេល ២៣ ឆ្នាំមកនេះ។

នៅពេលដែលអ្នកគាំទ្រសម្រុកចូលទីលាន ប៉ូលិសបានបាញ់ឧស្ម័នបង្ហូរទឹកភ្នែក ដែលជាហេតុជំរុញឲ្យអ្នកគាំទ្រភ័យស្លន់ស្លោ រត់ទៅរកច្រកចេញ។

អ្នក​ខ្លះ​ថប់​ដង្ហើម​ក្នុង​ភាព​ចលាចលនេះ ចំណែក​អ្នក​ខ្លះ​ទៀត​ត្រូវគេ​ជាន់ដល់ស្លាប់។ មន្ត្រីប៉ូលិសពីរនាក់ស្ថិតក្នុងចំណោមអ្នកស្លាប់នៅកីឡដ្ឋាន រួមទាំងកុមារ១៧នាក់ផងដែរ។

កាលពីថ្ងៃអាទិត្យ លោកប្រធានាធិបតី Joko Widodo បានបញ្ជាឲ្យមានការស៊ើបអង្កេតលើសោកនាដកម្មនេះ ត្រួតពិនិត្យសុវត្ថិភាពនៃការប្រកួតបាល់ទាត់ទាំងអស់ និងកែលម្អ សុវត្ថិភាពឡើងវិញ។

លោក Widodo និយាយថា “ខ្ញុំសោកស្តាយយ៉ាងខ្លាំងចំពោះសោកនាដកម្មនេះ ហើយខ្ញុំសង្ឃឹមថា សោកនាដកម្មបាល់ទាត់បែបនេះ នឹងលែងកើតមានទៀតហើយ ក្នុងប្រទេសរបស់យើង”៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ កុមារ ១៧នាក់ ស្ថិតក្នុងចំណោមអ្នកស្លាប់ នៅ ឥណ្ឌូណេស៊ី